Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 102: Jisas i Stap Laip

Stori 102: Jisas i Stap Laip

YU SAVE dispela meri na tupela man ol i husat? Meri hia em Maria bilong Makdala, wanpela pren bilong Jisas. Na tupela man i gat waitpela klos, ol i ensel. Maria i lukluk i go insait long matmat we ol i bin putim bodi bilong Jisas. Tasol nau bodi i no stap! Husat i kisim? Orait yumi ken stori long dispela.

Ol ensel toktok long Maria bilong Makdala

Taim Jisas i dai pinis, ol pris i tokim Pailat: ‘Bipo Jisas i tok bihain long 3-pela de em bai kirap bek. Olsem na yu mas tok na ol i mas was long matmat, nogut ol disaipel bilong em i stilim bodi bilong em na tok olsem em i kirap bek!’ Pailat i tokim ol pris long salim ol soldia i go was long matmat.

Tasol long bikmoning tru long namba 3 de, wantu wanpela ensel bilong Jehova i kam. Em i rausim ston i pasim maus bilong matmat. Ol soldia i pret tru na sanap tasol. Bihain, taim ol i lukluk i go insait long matmat, bodi bilong Jisas i no stap moa! Sampela soldia i ran i go tokim ol pris. Yu save ol dispela pris nogut i mekim wanem? Ol i baim ol dispela soldia long mekim tok giaman. Ol pris i tokim ol soldia: ‘Yupela i mas tok, ol disaipel bilong em i kam stilim bodi taim mipela i slip.’

Sampela meri i go lukim matmat. Ol i kirap nogut tru long lukim matmat i stap nating! Wantu tupela ensel em klos bilong ol i lait tru, ol i kamap long ol dispela meri. Ol i tok: ‘Bilong wanem yupela i kam painim Jisas long hia? Em i kirap bek pinis. Yupela go hariap na tokim ol disaipel bilong em.’ Ol meri i ran spit i go! Taim ol i go yet long rot, wanpela man i pasim ol. Yu save em husat? Em Jisas! Em i tok: ‘Yupela go tokim ol disaipel bilong mi.’

Taim ol meri i tokim ol disaipel olsem Jisas i stap laip na ol i lukim em, ol disaipel i no bilipim tok bilong ol. Pita na Jon i ran i go long lukim matmat, tasol matmat i stap nating! Taim Pita na Jon i go bek, Maria bilong Makdala i stap bek long matmat. Em long dispela taim em i lukluk i go insait long matmat na lukim dispela tupela ensel.

Yu save wanem samting i kamap long bodi bilong Jisas? God i pinisim dispela bodi. God i no kirapim bek Jisas long wankain bodi em i gat paslain long em i dai. God i givim nupela bodi spirit long em, olsem bodi bilong ol ensel long heven. Tasol bilong soim ol disaipel olsem em i stap laip, Jisas inap tanim i kamap olsem man na bai ol inap lukim em. Bai yumi kisim save moa long dispela.

Matyu 27:62-66; 28:1-15; Luk 24:1-12; Jon 20:1-12.



Ol askim

  • Dispela meri long piksa em i husat? Dispela tupela man ol i husat? Ol i stap we?
  • Bilong wanem Pailat i tokim ol pris long salim ol soldia i go was long matmat bilong Jisas?
  • Long bikmoning tru long namba tri de, wanpela ensel i mekim wanem? Ol pris i mekim wanem?
  • Bilong wanem sampela meri i kirap nogut taim ol i go lukim matmat bilong Jisas?
  • Bilong wanem Pita na Jon i ran i go long matmat bilong Jisas? Ol i lukim wanem samting?
  • Wanem samting i kamap long bodi bilong Jisas? Jisas i mekim wanem bilong soim ol disaipel olsem em i stap laip?

Sampela askim moa

  • Ritim Matyu 27:62-66 na 28:1-15.

    Long taim Jisas i bin kirap bek, olsem wanem ol bikpris, ol Farisi, na ol hetman ol i mekim sin long holi spirit? (Mt. 12:24, 31, 32; 28:11-15)

  • Ritim Luk 24:1-12.

    Olsem wanem stori bilong kirap bek bilong Jisas i soim olsem Jehova i save tingim ol meri olsem ol i lain bilong tokaut stret long ol samting ol i lukim? (Lu. 24:4, 9, 10; Mt. 28:1-7)

  • Ritim Jon 20:1-12.

    Olsem wanem Jon 20:8, 9 i helpim yumi long save olsem yumi mas i gat pasin bilong wet i stap na no ken les sapos yumi no kliagut long truim bilong wanpela tok profet bilong Baibel? (Snd. 4:18; Mt. 17:22, 23; Lu. 24:5-8; Jo. 16:12)