Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 98: Long Maunten Oliv

Stori 98: Long Maunten Oliv

JISAS i stap long maunten Oliv. Dispela 4-pela man i stap wantaim em, em ol aposel bilong em. Em tupela brata, Andru na Pita, na narapela tupela brata, Jems na Jon. Long baksait yu inap lukim haus lotu bilong God long Jerusalem.

Em 2-pela de bihain long taim Jisas i bin sindaun long donki na i go insait long Jerusalem. Nau em Tunde. Long moningtaim Jisas i bin i go long haus lotu. Na ol pris i laik holim Jisas na kilim em i dai. Tasol ol i bin pret long mekim olsem, long wanem, ol manmeri i laikim Jisas.

Jisas na ol aposel bilong em

Jisas i kolim ol dispela hetman bilong lotu olsem ol ‘snek nogut!’ Na Jisas i tok God bai givim strafe long ol, long wanem, ol i bin mekim planti pasin nogut. Bihain Jisas i go antap long maunten Oliv, na dispela 4-pela aposel i kirap givim sampela askim long em. Yu save long ol samting ol i askim Jisas long en?

Ol aposel i askim Jisas long ol samting bai kamap bihain. Ol i save olsem Jisas bai pinisim olgeta pasin nogut long graun. Tasol ol i laik save long wanem taim dispela samting bai kamap. Wanem taim bai Jisas i kam bek gen bilong mekim wok olsem King?

Jisas i save olsem ol disaipel bilong em long graun bai i no inap lukim em taim em i kam bek. Ol bai i no inap lukim em, long wanem, em bai i stap long heven. Olsem na Jisas i tokim ol aposel long sampela samting bai kamap long graun taim em i mekim wok king long heven. Wanem sampela samting bai kamap?

Jisas i tok bai i gat ol bikpela pait, na planti man bai sik na hangre, pasin nogut bai i go bikpela, na bai i gat ol bikpela bikpela guria. Jisas i tok tu olsem ol bai autim gutnius bilong Kingdom Bilong God long olgeta hap bilong graun. Olsem wanem? Yumi lukim ol dispela samting i kamap long taim bilong yumi? Yes! Olsem na yumi ken save, Jisas i mekim pinis wok king long heven. Klostu nau bai em i pinisim olgeta pasin nogut long graun.

Matyu 21:46; 23:1-39; 24:1-14; Mak 13:3-10.



Ol askim

  • Long piksa, husat em Jisas? Husat i stap wantaim em?
  • Ol pris i laik mekim wanem long Jisas long haus lotu? Em i tok wanem long ol?
  • Ol aposel i askim Jisas long wanem samting?
  • Bilong wanem Jisas i tokim ol aposel long sampela samting bai kamap long graun taim em i mekim wok king long heven?
  • Jisas i tok wanem ol samting bai kamap paslain long em i pinisim olgeta pasin nogut long graun?

Sampela askim moa

  • Ritim Matyu 23:1-39.

    Tru Baibel i makim olsem i stret long mekim wok long ol biknem bilong ol man bilong graun, tasol tok bilong Jisas long Matyu 23:8-11 i kamapim klia wanem samting long pasin bilong mekim wok long ol biknem insait long kongrigesen Kristen? (Ap. 26:25; Ro. 13:7; 1 Pi. 2:13,14)

    Ol Farisi i mekim wok long wanem samting bilong pasim ol man long kamap Kristen? Olsem wanem ol hetman bilong lotu i bihainim wankain pasin long taim bilong yumi? (Mt. 23:13; Lu. 11:52; Jo. 9:22; 12:42; 1 Te. 2:16)

  • Ritim Matyu 24:1-14.

    Olsem wanem Matyu 24:13 i kamapim klia olsem em i bikpela samting long sanap strong na karim hevi?

    Dispela hap tok “las de” long Matyu 24:13 i makim wanem samting? (Mt. 16:27; Ro. 14:10-12; 2 Ko. 5:10)

  • Ritim Mak 13:3-10.

    Long Mak 13:10, wanem hap tok i makim olsem yumi mas hariap long autim gutnius? Tok bilong Jisas i mas mekim wanem long yumi? (Ro. 13:11, 12; 1 Ko. 7:29-31; 2 Ti. 4:2)