Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 93: Planti Man i Kisim Kaikai

Stori 93: Planti Man i Kisim Kaikai

WANPELA samting nogut tru i kamap. Nau tasol ol i bin kilim i dai Jon Bilong Baptais. Herodias, meri bilong king, em i no laikim Jon. Em i kirapim king long katim nek bilong Jon.

Taim Jisas i harim tok long dispela samting, em i bel hevi tru. Em i go long wanpela hap i no gat man. Tasol ol manmeri i bihainim em i go. Taim Jisas i lukim ol dispela manmeri, em i sori long ol. Olsem na em i tokim ol long Kingdom Bilong God, na em i oraitim ol manmeri i gat sik.

Long apinun ol disaipel i kam tokim em: ‘Em apinun pinis, na dispela hap i no gat man. Yu salim ol manmeri i go na bai ol i ken baim kaikai long ol ples i stap klostu.’

Jisas i givim kaikai long bikpela lain manmeri

Jisas i tok: ‘Bilong wanem ol i mas i go? Yupela givim kaikai long ol.’ Jisas i askim Filip: ‘Bai yumi baim kaikai we bilong olgeta dispela manmeri i ken kaikai?’

Filip i tok: ‘Sapos yumi baim bret long bikpela mani tru, em bai i no inap long olgeta i kisim liklik hap.’ Andru i tok: ‘Dispela mangi i gat 5-pela bret na 2-pela pis. Tasol em i no inap long olgeta manmeri.’

Jisas i tok: ‘Tokim ol manmeri long sindaun.’ Em i beten tok tenkyu long God long dispela kaikai, na em i kirap brukim bret. Orait nau ol disaipel i tilim bret na pis i go long olgeta manmeri. Inap 5,000 man i stap na planti tausen meri pikinini tu. Olgeta i kaikai i go inap long ol i pulap. Na taim ol disaipel i bungim ol hap kaikai i stap yet, inap 12-pela basket olgeta i pulap!

Orait nau Jisas i tokim ol disaipel long kalap long bot na go long hapsait bilong raunwara Galili. Tudak pinis na strongpela win na biksi i kirap, na si i sakim bot i go i kam. Ol disaipel i pret nogut tru. Na long biknait tru ol i lukim wanpela man i wokabaut antap long wara na i kam long ol. Ol i no save em i husat, olsem na ol i pret na singaut.

Tasol Jisas i tok: ‘Yupela i no ken pret. Em mi tasol!’ Ol disaipel i hatwok long ting olsem em Jisas. Olsem na Pita i tok: ‘Bikpela, sapos em yu tasol, orait yu tokim mi na mi ken wokabaut antap long wara na kam long yu.’ Jisas i tok: ‘Yu kam!’ Na Pita i lusim bot na wokabaut antap long wara! Bihain liklik em i pret na em i go daun liklik insait long wara, tasol Jisas i helpim em.

Bihain Jisas i givim kaikai long planti tausen man. Nau em i yusim 7-pela bret na sampela liklik pis long givim kaikai long ol. Na long dispela taim tu olgeta man i kisim gut kaikai. Jisas i save lukautim gut ol man, a? Taim em i mekim wok olsem King God i bin makim, bai yumi no inap tingting planti long wanpela samting!

Matyu 14:1-32; 15:29-38; Jon 6:1-21.



Ol askim

  • Wanem samting nogut tru i kamap long Jon Bilong Baptais? Dispela i mekim na Jisas i pilim olsem wanem?
  • Olsem wanem Jisas i givim kaikai long ol manmeri i bihainim em? Hamas kaikai i stap yet?
  • Long nait wanem samting i mekim na ol disaipel i pret? Wanem samting i kamap long Pita?
  • Long namba tu taim, olsem wanem Jisas i givim kaikai long planti tausen man?
  • Bilong wanem ol man bai amamas taim Jisas i bosim graun olsem King God i bin makim?

Sampela askim moa

  • Ritim Matyu 14:1-32.

    Stori i stap long Matyu 14:23-32 i helpim yumi long save long wanem pasin bilong Pita?

    Olsem wanem ol stori bilong Baibel i soim olsem Pita i kamap strongpela Kristen na em i winim pasin bilong em long mekim kwik ol samting? (Mt. 14:27-30; Jo. 18:10; 21:7; Ap. 2:14, 37-40; 1 Pi. 5:6, 10)

  • Ritim Matyu 15:29-38.

    Olsem wanem Jisas i no mekim nabaut long ol samting bilong skin em Papa bilong em i givim? (Mt. 15:37; Jo. 6:12; Kl. 3:15)

  • Ritim Jon 6:1-21.

    Olsem wanem ol Kristen long nau i ken bihainim pasin bilong Jisas long pasin ol i mekim long ol gavman? (Jo. 6:15; Mt. 22:21; Ro. 12:2; 13:1-4)