Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 91: Jisas i Skulim Ol Man

Stori 91: Jisas i Skulim Ol Man

LUKIM Jisas. Em i sindaun long wanpela maunten long Galili na skulim ol man. Ol man i sindaun klostu tru long em, em ol disaipel bilong em. Em i bin makim 12-pela bilong kamap aposel. Jisas i bin givim narakain gutpela wok long ol aposel. Yu save long nem bilong ol?

Jisas i skulim ol man

Wanpela em Saimon Pita na brata bilong em Andru. Na Jems na Jon, tupela tu i brata. Narapela aposel tu i gat nem Jems, na narapela tu em Saimon. Tupela aposel i gat nem Judas. Wanpela em Judas Iskariot, na narapela Judas ol i kolim tu Tadius. Na Filip na Nataniel (narapela nem bilong em Bartolomyu), na Matyu na Tomas.

Taim Jisas i lusim Samaria i kam, long namba wan taim em i kirap autim tok olsem: ‘Kingdom bilong heven i klostu pinis.’ Yu save dispela Kingdom em i wanem samting? Em i wanpela gavman tru bilong God. Jisas em i King bilong en. Em bai mekim wok king long heven na kamapim gutaim long graun. Kingdom bilong God bai mekim olgeta hap bilong graun i kamap Paradais.

Jisas i stap long maunten na em i skulim ol man long dispela Kingdom. Em i tok, ‘Yupela i mas beten olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Laik bilong yu i ken kamap long graun olsem i kamap long heven.” ’ Planti man i kolim dispela beten olsem ‘Beten Bilong Bikpela.’ Sampela i kolim olsem ‘Papa Bilong Mipela.’ Yu inap kolim olgeta tok bilong dispela beten?

Na tu, Jisas i skulim ol manmeri long pasin ol i mas mekim long ol narapela. Em i tok: ‘Olgeta pasin yupela i laik bai ol i mekim long yupela, ol dispela pasin tasol yupela i mas mekim long ol.’ Yu laik bai ol man i mekim gutpela pasin long yu, a? Olsem na Jisas i tok yumi mas mekim gutpela pasin long ol narapela. Taim graun i kamap Paradais, olgeta man bai mekim gutpela pasin tasol. Dispela i gutpela samting bilong amamas long en, a?

Matyu sapta 5 i go 7; Mt 10:1-4.



Ol askim

  • Long piksa, Jisas i stap we na em i skulim ol man? Ol man i sindaun klostu tru long em ol i husat?
  • Wanem nem bilong ol 12-pela aposel?
  • Dispela Kingdom em Jisas i autim tok long en em i wanem samting?
  • Jisas i skulim ol man long beten long wanem samting?
  • Jisas i tok wanem long pasin narapela i mas mekim long narapela?

Sampela askim moa

  • Ritim Matyu 5:1-12.

    Long wanem ol rot yumi inap soim olsem yumi tingim ol samting bilong spirit em yumi mas kisim? (Mt. 5:3; Ro. 10:13-15; 1 Ti. 4:13, 15, 16)

  • Ritim Matyu 5:21-26.

    Olsem wanem Matyu 5:23, 24 i kamapim klia olsem pasin bilong yumi long pas gut wantaim ol brata inap mekim sampela samting long pasin bilong yumi long pas gut wantaim Jehova? (Mt. 6:14, 15; Sng. 133:1; Kl. 3:13; 1 Jo. 4:20)

  • Ritim Matyu 6:1-8.

    Wanem sampela pasin inap makim olsem man i tingim em yet i stretpela man, na em ol pasin ol Kristen i mas sakim? (Lu. 18:11, 12; 1 Ko. 4:6, 7; 2 Ko. 9:7)

  • Ritim Matyu 6:25-34.

    Jisas i tok wanem bilong skulim yumi olsem em i bikpela samting long bilip olsem Jehova bai lukautim yumi long ol samting bilong skin? (Kis. 16:4; Sng. 37:25; Fl. 4:6)

  • Ritim Matyu 7:1-11.

    Tok piksa i stap long Matyu 7:5 i skulim yumi long wanem samting? (Snd. 26:12; Ro. 2:1; 14:10; Jem. 4:11, 12)