Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 90: Jisas i Toktok Wantaim Meri

Stori 90: Jisas i Toktok Wantaim Meri

JISAS i malolo klostu long wanpela hul wara long Samaria. Ol disaipel bilong em i go baim kaikai long taun. Dispela meri Jisas i toktok wantaim em, em i bin kam bilong pulimapim wara. Jisas i tokim em: ‘Wara i kam. Mi laik dring.’

Jisas i toktok wantaim wanpela meri Samaria

Meri i kirap nogut tru long dispela tok. Yu save bilong wanem em i kirap nogut? Em i kirap nogut, long wanem, Jisas em i wanpela Juda, na meri em i wanpela Samaria. Ol Juda i no save laikim ol Samaria. Na ol i no save toktok wantaim ol! Tasol Jisas i laikim olgeta kain man. Olsem na em i tok: ‘Sapos yu save long dispela man i tokim yu long givim wara long em, yu bai tokim em na em bai givim wara bilong laip long yu.’

Meri i tok: ‘Bikman, dispela hul wara i daun moa na yu no gat baket. Bai yu kisim we dispela wara bilong laip?’

Jisas i tok: ‘Sapos yu dring long dispela hul wara hia, nek bilong yu bai drai gen. Tasol wara mi laik givim long man bai mekim em i stap laip oltaim.’

Meri i tok: ‘Bikman, givim dispela wara long mi! Na bihain nek bilong mi i no ken drai gen. Na bai mi no ken kam hia bilong pulimapim wara.’

Meri i ting Jisas i tok long wara tru. Tasol em i tok long tok i tru bilong God na Kingdom bilong em. Dispela tok i tru i olsem wara bilong laip. Em inap givim laip oltaim long man.

Nau Jisas i tokim dispela meri: ‘Yu go singautim man bilong yu na kam bek long hia.’

Meri i tok: ‘Mi no gat man.’

Jisas i tok: ‘Yu tok stret, long wanem, bipo yu gat 5-pela man. Na dispela man nau yu stap wantaim em, em i no man bilong yu.’

Meri i kirap nogut, long wanem, Jisas i tok stret long dispela samting. Olsem wanem Jisas i save long dispela samting? Em i save, long wanem, em i dispela Man God i tok promis long salim i kam, na God i givim dispela save long em. Long dispela taim stret ol disaipel bilong Jisas i kam bek na ol i kirap nogut long em i toktok wantaim wanpela meri Samaria.

Dispela stori i lainim yumi long wanem samting? Jisas i save mekim gut long ol man bilong olgeta lain. Na yumi tu i mas mekim olsem. Yumi no ken ting olsem sampela manmeri ol i nogut, long wanem, ol i bilong narapela lain. Jisas i laik bai olgeta man i save long dispela tok i tru em inap helpim man long kisim laip oltaim. Na yumi tu i mas laik long helpim ol man long kisim save long tok i tru.

Jon 4:5-43; 17:3.



Ol askim

  • Bilong wanem Jisas i malolo klostu long wanpela hul wara long Samaria? Em i tok wanem long wanpela meri long dispela hap?
  • Bilong wanem dispela meri i kirap nogut? Jisas i tok wanem long em? Bilong wanem em i tok olsem?
  • Meri i ting Jisas i toktok long wanem kain wara? Tasol Jisas i toktok long wanem wara?
  • Bilong wanem meri i kirap nogut long Jisas i save long ol samting long i stap bilong em? Olsem wanem Jisas i save long ol dispela samting?
  • Stori bilong dispela meri long hul wara inap skulim yumi long wanem ol samting?

Sampela askim moa

  • Ritim Jon 4:5-43.

    Olsem Jisas i bin mekim, yumi mas mekim wanem kain pasin long ol man bilong narapela skin o sindaun? (Jo. 4:9; 1 Ko. 9:22; 1 Ti. 2:3, 4; Ta. 2:11)

    Man i kamap disaipel bilong Jisas em bai kisim wanem ol blesing long ol samting bilong spirit? (Jo. 4:14; Ais. 58:11; 2 Ko. 4:16)

    Olsem wanem yumi inap kamapim wankain pasin olsem meri Samaria, em i bin pilim tru ol samting em i lainim na em i gat laik tru long tokim ol narapela long en? (Jo. 4:7, 28; Mt. 6:33; Lu. 10:40-42)