Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 89: Jisas i Rausim Ol Man Nogut

Stori 89: Jisas i Rausim Ol Man Nogut

LONG dispela piksa Jisas i luk kros tru, a? Yu save bilong wanem em i kros? Em i kros, long wanem, ol dispela man i stap long haus lotu bilong God long Jerusalem ol i gat pasin bilong mangal long mani. Ol i laik pulim bikpela mani long ol manmeri i kam bilong lotuim God.

Jisas i kapsaitim ol tebol wantaim mani

Yu lukim ol dispela yangpela bulmakau na sipsip na pisin? Ol dispela man i wok long salim ol dispela animal insait long haus lotu. Yu save bilong wanem ol i mekim olsem? Long wanem, ol Israel i mas i gat ol animal na pisin bilong mekim ofa long God.

Lo bilong God i tok taim wanpela Israel i mekim rong, em i mas mekim ofa long God. Na i gat ol narapela taim tu ol Israel i mas mekim ofa long God. Tasol ol Israel i ken kisim we ol animal o pisin bilong mekim ofa long God?

Sampela Israel i gat ol pisin na animal bilong ol yet. Olsem na ol inap givim ol dispela animal olsem ofa. Tasol planti Israel i no gat ol animal o pisin. Na sampela ol i stap longwe tru long Jerusalem, na ol i no inap kisim wanpela animal bilong ol yet bilong mekim ofa. Olsem na ol manmeri i save go long haus lotu na baim ol animal o pisin bilong mekim ofa. Tasol ol dispela man i salim ol animal na pisin long bikpela pe tumas. Ol i wok long giamanim ol manmeri. Na tu, i no stret long ol i mekim wok bisnis insait long haus lotu bilong God.

Jisas i kros long dispela samting. Olsem na em i kapsaitim ol tebol wantaim mani bilong ol. Na tu, em i kisim rop na wokim wip na rausim ol animal long haus lotu. Em i tokim ol man i salim ol pisin: ‘Kisim ol dispela pisin i go! Yupela i no ken mekim haus bilong Papa bilong mi i kamap olsem haus maket!’

Sampela disaipel bilong Jisas i stap wantaim em long haus lotu long Jerusalem. Ol i kirap nogut long pasin Jisas i mekim. Tasol bihain ol i tingim wanpela tok bilong Baibel i stori long Pikinini Bilong God olsem: ‘Mi laikim tru haus bilong yu.’

Jisas i stap long Jerusalem bilong mekim bung bilong Pasova, na em i wokim planti mirakel tu. Bihain, Jisas i lusim Judia na wokabaut i go bek long Galili. Taim em i go bek, em i katim i go namel long hap bilong Samaria. Orait, nau yumi ken stori long samting i kamap long dispela hap.

Jon 2:13-25; 4:3, 4.



Ol askim

  • Bilong wanem ol man i salim ol animal insait long haus lotu?
  • Wanem samting i mekim Jisas i kros?
  • Olsem yu ken lukim long piksa, Jisas i mekim wanem? Em i tok wanem long ol man i salim ol pisin?
  • Taim ol disaipel bilong Jisas i lukim pasin em i mekim, ol i tingim wanem samting?
  • Taim Jisas i go bek long Galili, em i katim i go namel long wanem hap?

Wanpela askim moa

  • Ritim Jon 2:13-25.

    Yumi save olsem Jisas i bin kros long ol man i senisim mani insait long haus lotu, olsem na yumi mas i gat wanem stretpela tingting long pasin bilong mekim ol wok bisnis insait long Haus Kingdom? (Jo. 2:15, 16; 1 Ko. 10:24, 31-33)