Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 85: Mama i Karim Jisas

Stori 85: Mama i Karim Jisas

YU SAVE dispela liklik bebi em i husat? Yes, em Jisas. Mama i karim em long haus bilong ol bulmakau samting. Maria i slipim Jisas long bokis kaikai bilong ol bulmakau. Tasol bilong wanem Maria na Josep i stap hia wantaim ol animal? Em i no gutpela ples bilong karim pikinini, a?

Em tru. Tasol ol i stap long dispela ples, long wanem, man i bosim gavman Rom, em Sisar Ogastus, em i putim wanpela lo olsem olgeta manmeri i mas go bek long as ples na bai gavman i ken putim nem bilong ol long wanpela buk. Mama i bin karim Josep long Betlehem. Tasol taim Josep na Maria i kamap long Betlehem, olgeta haus pasindia i pulap pinis. Olsem na ol i kam stap hia wantaim ol animal. Na long dispela taim stret Maria i karim Jisas! Tasol olsem yu inap lukim long piksa, pikinini i stap orait.

Josep, Maria, na bebi Jisas

Yu inap lukim ol wasman bilong sipsip i kam bilong lukim Jisas? Ol i stap ausait na lukautim ol sipsip long nait, na wantu ol i lukim bikpela lait. Em wanpela ensel! Ol wasman i pret nogut tru. Tasol ensel i tok: ‘Yupela i no ken pret! Mi bringim gutnius i kam long yupela. Nau long dispela de, long Betlehem, mama i karim pinis Krais em Bikpela. Em bai kisim bek ol man! Bai yupela i lukim ol i bin pasim em long laplap na em i slip long bokis kaikai bilong ol bulmakau.’ Wantu planti ensel i kamap na ol i litimapim nem bilong God. Olsem na ol wasman i hariap i go bilong painim Jisas, na nau ol i painim em pinis.

Yu save bilong wanem ol ensel na wasman i amamas tru long Jisas? Yu save em i husat tru? Yu tingim, long namba wan stori bilong dispela buk yumi bin stori long namba wan Pikinini Bilong God. Dispela Pikinini i bin wok wantaim Jehova long wokim ol samting long ples antap na graun na olgeta arapela samting. Dispela namba wan Pikinini Bilong God em Jisas yet!

Yes, Jehova i kisim laip bilong Pikinini bilong em long heven na putim long bel bilong Maria. Orait nau wanpela bebi i kamap insait long bel bilong Maria wankain olsem ol arapela bebi i save kamap insait long bel bilong mama. Tasol dispela bebi em i Pikinini Bilong God. Bihain mama i karim Jisas long dispela haus bilong ol bulmakau long Betlehem. Olsem wanem? Nau yu save long as na ol ensel i bin amamas tru long tokim ol man olsem mama i karim pinis Jisas?

Luk 2:1-20.



Ol askim

  • Dispela liklik bebi long piksa em i husat? Maria i putim em i slip long wanem hap?
  • Bilong wanem mama i karim Jisas long haus bilong ol bulmakau wantaim ol animal?
  • Long piksa, ol dispela man i kam insait long haus bilong ol bulmakau ol i husat? Wanpela ensel i bin tok wanem long ol?
  • Bilong wanem ol ensel na ol wasman i amamas tru long Jisas?
  • Bilong wanem ol inap kolim Jisas olsem Pikinini Bilong God?

Sampela askim moa

  • Ritim Luk 2:1-20.

    Olsem wanem ol samting Sisar Ogastus i mekim i helpim truim bilong tok profet long mama bai karim Jisas long wanem hap? (Lu. 2:1-4; Mai. 5:2)

    Olsem wanem ol man inap insait long dispela lain em Baibel i kolim ol olsem “ol manmeri God i belgut long ol”? (Lu. 2:14, NW; Mt. 16:24; Jo. 17:3; Ap. 3:19; Hi. 11:6)

    Ol wasman bilong sipsip ol i bin amamas, long wanem, mama i karim Man Bilong Kisim Bek ol, tasol long nau wanem samting i bikpela moa na i stret ol wokboi bilong God i ken amamas long en? (Lu. 2:10, 11; Ef. 3:8, 9; KTH 11:15; 14:6)