Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 82: Mordekai na Esta

Stori 82: Mordekai na Esta

ORAIT, nau yumi ken stori long wanpela samting i bin kamap sampela yia paslain long taim Esra i go long Jerusalem. Long dispela taim, tupela Israel, em Mordekai na Esta, ol i gat nem long kantri Persia. Esta em i kwin, na kasen bilong em, Mordekai, em i nambatu long king. Orait nau yumi ken stori long olsem wanem dispela samting i kamap.

Papamama bilong Esta i bin dai taim Esta i stap liklik yet, olsem na Mordekai i lukautim em. Serksis, em king bilong Persia, em i gat haus king long taun Susa, na Mordekai em i wanpela wokman bilong em. Wanpela taim meri bilong king, em Kwin Vasti, em i sakim tok bilong king, olsem na king i rausim em na makim wanpela nupela kwin. Yu save long dispela meri em i bin makim? Yes, em i makim wanpela yangpela meri i gat naispela skin, em Esta.

Haman i belhat long Mordekai

Orait, yu lukim dispela hambakman em ol manmeri i brukim skru long em? Dispela man em Haman. Em i wanpela man i gat biknem tru long Persia. Haman i laik bai Mordekai tu i brukim skru long em, tasol Mordekai i sindaun i stap, olsem yu ken lukim long piksa hia. Em i no laik brukim skru long dispela man nogut. Olsem na Haman i belhat nogut tru. Em i mekim ol samting olsem:

Em i go lukim king na sutim ol tok giaman long ol Israel. Em i tok: ‘Ol i manmeri nogut na ol i no save bihainim ol lo bilong king. Ol i mas i dai.’ Serksis i no save olsem meri bilong em Esta em i wanpela Israel. Olsem na em i bihainim tok bilong Haman, na em i putim lo i makim wanpela de bilong kilim i dai olgeta Israel.

Taim Mordekai i harim tok long dispela lo, em i bel hevi tru. Em i salim tok i go long Esta: ‘Yu mas tokim king na askim em long helpim yumi.’ Lo bilong Persia i tambu long man i go lukim king sapos king i no bin singautim em. Tasol Esta i go lukim king maski king i no bin singautim em. King i apim stik gol bilong em na makim i go long Esta, na dispela i makim olsem ol i no inap kilim em i dai. Esta i singautim king na Haman long i kam long wanpela bikpela kaikai. Taim ol i kaikai i stap, king i askim Esta long wanem samting em i laik bai king i givim em. Esta i tok em bai tokim king sapos king na Haman i kam gen long narapela kaikai long neks de.

Long dispela kaikai Esta i tokim king: ‘Ol bai kilim i dai mi wantaim lain bilong mi.’ King i belhat na em i tok: ‘Husat i laik mekim dispela samting?’

Esta i tok: ‘Dispela birua em Haman!’

Kwin Esta i tokaut olsem Haman i birua long em na lain bilong em

Nau king i belhat nogut tru. Em i tokim ol wokman bilong em long kilim i dai Haman. Bihain king i givim bikpela namba long Mordekai na Mordekai i kamap nambatu bilong king. Mordekai i wokim rot na ol i putim nupela lo i orait long ol Israel i ken bekim pait long dispela de ol i bin makim bilong kilim ol i dai. Mordekai i gat bikpela namba, olsem na planti manmeri ol i helpim ol Israel na ol birua i no kilim ol i dai.

Buk Esta 1-10.



Ol askim

  • Mordekai na Esta ol i husat?
  • Bilong wanem King Serksis i laik kisim nupela meri? Em i makim husat?
  • Haman em i husat? Wanem samting i mekim na em i belhat nogut tru?
  • Ol i putim wanem lo? Esta i mekim wanem taim em i kisim pinis tok bilong Mordekai?
  • Wanem samting i painim Haman? Wanem samting i painim Mordekai?
  • Olsem wanem ol Israel i abrusim bagarap long han bilong ol birua?

Sampela askim moa

  • Ritim Esta 2:12-18.

    Olsem wanem Esta i soim olsem em i bikpela samting long kamapim “pasin bilong i stap belgut na i stap bel isi”? (Est. 2:15; 1 Pi. 3:1-5)

  • Ritim Esta 4:1-17.

    Esta i gat rot long helpim lotu i tru, na wanem rot i op long yumi bilong kamapim olsem yumi givim bel olgeta na stap gut long Jehova? (Est. 4:13, 14; Mt. 5:14-16; 24:14)

  • Ritim Esta 7:1-6.

    Olsem Esta, olsem wanem planti manmeri bilong God long nau i save bihainim laik bilong God maski ol man inap mekim nogut long ol? (Est. 7:4; Mt. 10:16-22; 1 Pi. 2:12)