Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 81: Ol i Bilip Long God Bai Helpim Ol

Stori 81: Ol i Bilip Long God Bai Helpim Ol

PLANTI tausen manmeri i lusim Babilon na bihainim longpela rot i go bek long Jerusalem. Taim ol i kamap pinis long Jerusalem, ol i lukim ples i bagarap. I no gat wanpela man i stap. Ol Israel i mas wokim gen Jerusalem.

Pastaim ol i wokim wanpela alta. Em bilong putim ol animal samting na mekim ofa long Jehova. Sampela mun bihain ol Israel i kirap long wokim haus lotu. Tasol ol birua em ol i sindaun klostu long ol, ol i no laik bai ol Israel i wokim gen haus lotu. Olsem na ol i pretim ol bilong pasim wok bilong ol. Bihain ol i tokim king bilong Persia long putim lo na tambuim ol Israel long wokim dispela haus lotu.

Planti yia i lus. Kirap long taim ol Israel i lusim Babilon na i kam i stap long ples bilong ol, inap 17 yia i lus pinis. Jehova i salim profet Hagai na Sekaraia long tokim ol manmeri long kirapim gen wok bilong sanapim haus lotu. Ol manmeri i bilip long God bai helpim ol, na ol i bihainim tok bilong ol profet. Ol i kirapim gen dispela wok, maski lo i tambuim ol long mekim.

Olsem na wanpela namba wan gavman bilong dispela provins bilong Persia i kam na askim ol Israel long husat i tok orait long ol i mekim dispela wok. Ol Israel i tokim em olsem taim ol i bin stap long Babilon, King Sairus i bin tokim ol olsem: ‘Yupela i mas go bek long Jerusalem na wokim haus lotu bilong Jehova, em God bilong yupela.’

Tatenai i salim pas i go long Babilon na askim olsem tru tru Sairus i bin mekim dispela tok o nogat. Sairus i dai pinis, tasol nupela king bilong Persia i bekim pas. Long pas em i kamapim olsem tru tru Sairus i bin mekim dispela tok. King i tok: ‘Larim ol Israel i wokim haus lotu bilong God bilong ol. Na yupela i mas helpim ol.’ Inap 4-pela yia bihain ol i pinisim dispela wok na ol Israel i amamas tru.

Planti yia moa i lus. Kirap long taim ol i bin pinisim wok bilong sanapim haus lotu na i kam inap nau, klostu 48 yia i lus pinis. Ol manmeri long Jerusalem i stap rabis, na taun na haus lotu i bagarap liklik. Long Babilon, Esra i harim tok long dispela samting. Olsem na yu save em i mekim wanem?

Em i go lukim Artaserksis, em king bilong Persia, na dispela gutpela king i givim planti presen long Esra bilong karim i go bek long Jerusalem. Esra i askim ol Israel i stap long Babilon long helpim em long karim ol dispela samting i go long Jerusalem. Inap olsem 6,000 manmeri i laik i go. I gat planti silva, gol, na ol arapela gutpela samting em ol bai karim i go long Jerusalem.

Esra i tingting planti, long wanem, i gat planti man nogut long rot. Em i pret, nogut ol dispela man nogut i kisim silva na gol bilong ol, na kilim ol i dai. Olsem na Esra i singautim ol manmeri i kam bung, olsem yu ken lukim long dispela piksa. Ol i beten askim Jehova long lukautim ol taim ol i bihainim longpela rot i go bek long Jerusalem.

Esra na ol manmeri i beten

Jehova i lukautim ol. Ol i wokabaut i go inap 4-pela mun na bihain ol i kamap long Jerusalem. Dispela i soim olsem Jehova i save lukautim ol man i bilip long Em bai helpim ol.

Esra sapta 2 i go 8.



Ol askim

  • Hamas manmeri i lusim Babilon na bihainim longpela rot i go bek long Jerusalem? Ol i lukim wanem samting taim ol i kamap long Jerusalem?
  • Ol Israel i kirap long wokim wanem samting taim ol i kamap pinis? Tasol ol birua bilong ol i mekim wanem?
  • Hagai na Sekaraia ol i husat? Ol i tok wanem long ol manmeri?
  • Bilong wanem Tatenai i salim pas i go long Babilon? Em i kisim wanem bekim long askim bilong em?
  • Esra i mekim wanem taim em i save olsem i gat wok long stretim haus lotu bilong God?
  • Long piksa Esra i beten long wanem samting? God i harim beten bilong Esra, na God i mekim wanem? Dispela i skulim yumi long wanem samting?

Sampela askim moa

  • Ritim Esra 3:1-13.

    Sapos yumi stap long wanpela hap i no gat kongrigesen bilong lain bilong God, yumi mas wok yet long mekim wanem? (Esr. 3:3, 6; Ap. 17:16, 17; Hi. 13:15)

  • Ritim Esra 4:1-7.

    Long pasin bilong bungim bilip Kristen wantaim ol bilip haiden, olsem wanem Serubabel i makim gutpela pasin em lain bilong Jehova i ken bihainim? (Kis. 34:12; 1 Ko. 15:33; 2 Ko. 6:14-17)

  • Ritim Esra 5:1-5, 17 na 6:1-22.

    Bilong wanem ol birua i no inap long pasim wok bilong sanapim haus lotu? (Esr. 5:5; Ais. 54:17)

    Olsem wanem pasin ol hetman bilong Juda i mekim inap kirapim ol elda Kristen long askim Jehova long stiaim ol taim ol man i birua long ol? (Esr. 6:14; Sng. 32:8; Ro. 8:31; Jem. 1:5)

  • Ritim Esra 8:21-23, 28-36.

    Paslain long yumi kirap mekim wanpela samting, i gutpela long yumi bihainim wanem pasin bilong Esra? (Esr. 8:23; Sng. 127:1; Snd. 10:22; Jem. 4:13-15)