Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 80: Ol i Lusim Babilon

Stori 80: Ol i Lusim Babilon

OL Midia na Persia i daunim Babilon na 2-pela yia bihain ol Israel i lusim Babilon. Yu lukim ol long dispela piksa? Olsem wanem na ol inap lusim Babilon? Husat i helpim ol na ol inap i go?

Sairus, em king bilong Persia, em i helpim ol. Planti yia paslain long mama i karim Sairus, Jehova i mekim tok profet long Sairus long maus bilong Aisaia, olsem: ‘Yu bai mekim ol samting mi laik yu mas mekim. Ol dua bilong taun bai op na bai yu go insait na kisim taun.’ Na tru tru, Sairus i bin go pas long daunim Babilon. Ol Babilon i bin larim ol dua i op i stap, olsem na ol Midia na Persia i go insait na kisim taun.

Tasol profet bilong Jehova, em Aisaia, i tok tu olsem Sairus bai tokim ol Israel long wokim gen Jerusalem na haus lotu bilong en. Olsem wanem? Sairus i bin mekim olsem? Yes, em i bin mekim. Sairus i tokim ol Israel: ‘Yupela i go long Jerusalem na wokim haus lotu bilong Jehova, em God bilong yupela.’ Na long dispela piksa yu ken lukim ol Israel i go bilong mekim olsem.

Ol Israel i lusim Babilon

Tasol sampela Israel ol i no inap wokabaut long longpela rot i go bek long Jerusalem. Jerusalem i stap longwe inap 800 kilomita, na planti ol i lapun tru o ol i gat sik, olsem na ol i no inap i go longwe. Na i gat ol narapela samting tu i mekim na sampela Israel i no go, olsem na Sairus i tokim ol: ‘Givim silva na gol na ol arapela samting long ol manmeri i go bek bilong wokim Jerusalem na haus lotu bilong en.’

Orait, ol i givim planti samting long ol Israel i go bek long Jerusalem. Na tu, Sairus i givim ol dis na ol kap em Nebukatnesar i bin kisim long haus lotu bilong Jehova taim em i bagarapim Jerusalem. Ol manmeri i gat planti samting bilong kisim i go.

Ol i wokabaut long rot inap 4-pela mun samting, na ol i kamap long Jerusalem long taim stret. Kirap long taim Jerusalem i bagarap na i stap nating i kam inap long taim ol Israel i go bek, em i olsem 70 yia stret. Ol Israel i sindaun gen long kantri bilong ol, tasol planti hevi bai painim ol. Nau yumi ken stori long dispela samting.

Aisaia 44:28; 45:1-4; Esra 1:1-11.



Ol askim

  • Olsem piksa i kamapim, ol Israel i mekim wanem?
  • Olsem wanem Sairus i truim tok profet Jehova i bin mekim long maus bilong Aisaia?
  • Sairus i tok wanem long ol Israel em ol i no inap i go bek long Jerusalem?
  • Sairus i givim wanem samting long ol manmeri bilong kisim i go bek long Jerusalem?
  • Ol Israel i wokabaut inap hamas mun bilong i go kamap long Jerusalem?
  • Graun bilong Jerusalem i stap nating inap hamas yia?

Sampela askim moa

  • Ritim Aisaia 44:28 na 45:1-4.

    Olsem wanem Jehova i kamapim strong olsem tok profet bilong em long Sairus bai kamap tru? (Ais. 55:10, 11; Ro. 4:17)

    Tok profet em Aisaia i mekim long Sairus i kamapim wanem samting long strong bilong Jehova long tokaut long ol samting bai kamap bihain? (Ais. 42:9; 45:21; 46:10, 11; 2 Pi. 1:20)

  • Ritim Esra 1:1-11.

    Sapos yumi bihainim pasin bilong ol man em ol i no inap i go bek long Jerusalem, olsem wanem yumi long nau inap “helpim” ol lain i insait long fultaim sevis? (Esr. 1:4, 6; Ro. 12:13; Kl. 4:12)