Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 75: Fopela Mangi Long Babilon

Stori 75: Fopela Mangi Long Babilon

KING Nebukatnesar i kisim olgeta lain Israel i gat gutpela skul i go long Babilon. Bihain em i makim ol mangi i gat gutpela skin na save, winim ol arapela. Fopela bilong ol em ol dispela mangi yu lukim long piksa. Wanpela em Daniel, na long 3-pela narapela mangi ol Babilon i givim nem long ol olsem Satrak, Mesak, na Abetnego.

Nebukatnesar i laik givim skul long ol dispela mangi na bai ol i mekim wok long haus king bilong em. Bihain long 3-pela yia em bai makim tasol ol mangi i gat bikpela save bilong helpim em long stretim ol hevi. King i laik bai skin bilong ol i kamap strongpela taim ol i wok long kisim skul. Olsem na em i tokim ol wokman bilong em long givim gutpela kaikai na wain long ol, wankain olsem em na famili bilong em i save kisim.

Daniel, Satrak, Mesak, na Abetnego i tokaut bilip bilong ol

Lukim yangpela Daniel. Yu save em i tok wanem long namba wan ofisa bilong Nebukatnesar, em Aspenas? Daniel i tokim em olsem em i no laik kisim ol gutpela kaikai em king i salim i kam. Tasol Aspenas i tingting planti. Em i tok: ‘King i makim pinis ol kaikai na dring bilong yupela. Na sapos yupela i no kisim dispela kaikai na skin bilong yupela i no kamap gut olsem bilong ol arapela mangi, king bai kilim mi i dai.’

Olsem na Daniel i go lukim wasman em Aspenas i bin makim bilong lukautim Daniel na 3-pela pren bilong em. Em i tok: ‘Plis, mi laik bai yu traim mipela inap 10-pela de. Givim mipela ol sayor samting na wara bilong dring. Bihain yu ken skelim skin bilong mipela wantaim skin bilong ol arapela mangi em ol i kisim kaikai bilong king, na yu ken skelim skin bilong husat i gutpela moa.’

Wasman i orait long dispela samting. Na bihain long 10-pela de, skin bilong Daniel na 3-pela pren bilong em i gutpela moa, winim ol arapela mangi. Olsem na wasman i larim ol i kaikai ol sayor samting na ol i no kisim kaikai bilong king.

Bihain long 3-pela yia, ol i kisim olgeta dispela yangpela man i go long King Nebukatnesar. Em i toktok wantaim olgeta, na em i lukim olsem save bilong Daniel na 3-pela pren bilong em i winim tru save bilong ol arapela. Olsem na em i givim wok long ol long haus king. Na taim king i givim sampela askim long Daniel, Satrak, Mesak, na Abetnego, o em i kamapim sampela hevi long ol, ol inap bekim gut na stretim gut ol hevi, winim tru ol pris na saveman bilong king.

Daniel 1:1-21.



Ol askim

  • Ol dispela 4-pela mangi long piksa ol i husat? Bilong wanem ol i stap long Babilon?
  • Nebukatnesar i laik mekim wanem long ol dispela 4-pela mangi? Em i tokim ol wokman bilong em long mekim wanem?
  • Daniel i askim ol long givim wanem kain kaikai na dring long em na 3-pela pren bilong em?
  • Daniel na 3-pela pren bilong em ol i kaikai ol sayor samting inap 10-pela de, na skin bilong ol i olsem wanem taim ol i skelim ol wantaim ol arapela mangi?
  • Olsem wanem na Daniel na 3-pela pren bilong em ol i stap long haus king? Ol i winim ol pris na saveman long mekim wanem?

Sampela askim moa

  • Ritim Daniel 1:1-21.

    Yumi mas wok strong long mekim wanem ol samting sapos yumi laik sakim ol traim na daunim ol pasin kranki? (Dan. 1:8; Stt. 39:7, 10; Ga. 6:9)

    Wanem ol traim inap painim ol yangpela long nau long insait long ol samting ol man i ting em i switpela “kaikai na dring”? (Dan. 1:8; Snd. 20:1; 2 Ko. 6:17-7:1)

    Stori bilong Baibel long fopela yangpela Hibru i helpim yumi long ting olsem wanem long pasin bilong kisim bikpela skul? (Dan. 1:20; Ais. 54:13; 1 Ko. 3:18-20)