Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 65: Lain Israel i Bruk

Stori 65: Lain Israel i Bruk

YU SAVE bilong wanem dispela man i brukim klos bilong em? Jehova i tokim em long mekim. Dispela man em Ahiya, em profet bilong God. Yu save long wok bilong ol profet? Em i wanpela man God i save tokim em long ol samting bai kamap long bihain.

Ahiya na Jeroboam

Ahiya i toktok wantaim Jeroboam. Solomon i bin makim Jeroboam long bosim ol man i wok long sanapim sampela haus samting bilong em. Taim Ahiya i bungim Jeroboam long rot, Ahiya i mekim wanpela narapela kain samting. Em i rausim nupela klos bilong em na brukim long 12-pela hap. Em i tokim Jeroboam: ‘Yu kisim 10-pela hap.’ Yu save bilong wanem Ahiya i givim 10-pela hap laplap long Jeroboam?

Ahiya i tok Jehova bai rausim wok king bilong Solomon. Em i tok Jehova bai givim 10-pela lain long Jeroboam. Dispela i makim olsem tupela lain tasol bai stap bilong pikinini bilong Solomon, Rehoboam, i ken bosim.

Taim Solomon i save long dispela tok Ahiya i bin givim long Jeroboam, em i kros nogut tru. Em i laik kilim i dai Jeroboam. Tasol Jeroboam i ranawe i go long Isip. Bihain liklik, Solomon i dai. Em i bin stap king inap 40 yia, tasol nau pikinini bilong em, Rehoboam, i kamap king. Jeroboam i stap long Isip na harim olsem Solomon i dai pinis, olsem na em i go bek long Israel.

Rehoboam em i no gutpela king. Em i mekim hatpela pasin moa yet long ol manmeri, winim papa bilong em Solomon. Jeroboam na sampela bikman ol i go long King Rehoboam na askim em long mekim gut moa long ol manmeri. Tasol Rehoboam i no harim tok. Em i kirap mekim hatpela pasin moa yet. Olsem na ol manmeri i mekim Jeroboam i kamap king bilong 10-pela lain, tasol tupela lain, em Benjamin na Juda, ol i larim Rehoboam i stap king bilong ol.

Jeroboam i no laik bai lain bilong em i go long Jerusalem na mekim lotu long haus lotu bilong Jehova. Olsem na em i wokim tupela bulmakau gol na kirapim ol manmeri bilong 10-pela lain bilong Israel long lotuim ol. I no longtaim na pasin bilong kros pait i pulap long dispela ples.

Hevi i painim tupela lain tu. Rehoboam i no winim yet 5-pela yia bilong wok king na king bilong Isip i kam bilong pait long Jerusalem. Em i kisim planti gutpela samting long haus lotu bilong Jehova. Olsem na inap liklik taim tasol haus lotu i stap gutpela olsem ol i bin wokim pastaim.

1 King 11:26-43; 12:1-33; 14:21-31.



Ol askim

  • Wanem nem bilong dispela tupela man long piksa? Ol i husat?
  • Ahiya i mekim wanem long klos bilong em? Dispela samting em i mekim i makim wanem samting?
  • Solomon i laik mekim wanem long Jeroboam?
  • Bilong wanem ol manmeri i mekim Jeroboam i kamap king bilong 10-pela lain?
  • Bilong wanem Jeroboam i wokim 2-pela bulmakau gol? I no longtaim na ol manmeri i mekim wanem pasin?
  • Wanem samting i painim 2-pela lain Israel na haus lotu bilong Jehova long Jerusalem?

Sampela askim moa

  • Ritim 1 King 11:26-43.

    Jeroboam i wanem kain man? Jehova i tok promis long mekim wanem long em sapos em i bihainim ol lo bilong God? (1 Kin. 11:28, 38)

  • Ritim 1 King 12:1-33.

    Pasin bilong Rehoboam long mekim wok nogut long namba em i holim, em inap skulim ol papamama na ol elda long wanem samting? (1 Kin. 12:13; 1 Pi. 5:2, 3)

    Ol yangpela long nau i mas lukluk long husat long stiaim ol taim ol i skelim ol bikpela samting long laip bilong ol? (1 Kin. 12:6, 7; Snd. 1:8, 9; 2 Ti. 3:16, 17; Hi. 13:7)

    Wanem samting i kirapim Jeroboam long redim 2-pela ples bilong lotuim bulmakau? Olsem wanem dispela i soim olsem em i no bilip liklik long Jehova? (1 Kin. 11:37; 12:26-28)

    Husat i go pas long pulim ol manmeri bilong 10-pela lain long sakim lotu i tru? (1 Kin. 12:32, 33)