Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 63: Saveman King Solomon

Stori 63: Saveman King Solomon

SOLOMON i yangpela man yet taim em i kamap king. Em i laikim tru Jehova, na em i bihainim gutpela tok papa bilong em Devit i bin givim long em. Jehova i amamas long Solomon, olsem na wanpela nait long rot bilong driman, Jehova i tokim em: ‘Solomon, yu laik bai mi givim wanem samting long yu?’

Solomon i tok: ‘Jehova, yu God bilong mi, mi mangi nating na mi no save long pasin bilong bosim ol manmeri. Olsem na givim savetingting long mi na bai mi inap bosim gut ol manmeri bilong yu.’

Jehova i amamas long samting Solomon i askim em long en. Em i tok: ‘Yu bin askim mi long givim yu savetingting, na yu no askim mi long larim yu i stap longpela taim o givim planti mani samting long yu, olsem na mi bai givim planti savetingting long yu, winim olgeta arapela man. Tasol mi bai givim tu ol samting yu no bin askim long en, planti mani kago na biknem.’

Bihain liklik tupela meri i kam long Solomon, na ol i gat wanpela hevi i hatwok long stretim. Wanpela i tok: ‘Mi na dispela meri i save stap long wanpela haus. Mi karim pikinini man, na tupela de bihain em tu i karim pikinini man. Bihain bebi bilong em i dai. Tasol taim mi slip i stap, em i kisim pikinini bilong em i dai pinis na putim klostu long mi na em i kisim bebi bilong mi. Taim mi kirap na lukim dispela pikinini, mi save olsem em i no pikinini bilong mi.’

Tasol narapela meri i tok: ‘Nogat! Pikinini i stap laip yet em bilong mi, na pikinini i dai pinis em bilong yu!’ Tasol namba wan meri i tok: ‘Nogat! Pikinini i dai pinis em bilong yu, na pikinini i stap laip yet em bilong mi!’ Tupela meri i wok long tok pait olsem. Solomon bai mekim wanem?

Em i tokim wanpela wokman long kisim bainat i kam, na em i tok: ‘Katim dispela bebi i stap laip long namel na givim wanpela hap long wanpela meri, na narapela hap long narapela meri.’

Mama tru bilong pikinini i tok: ‘Nogat! Plis no ken kilim i dai pikinini. Givim em long dispela narapela meri!’ Tasol narapela meri i tok: ‘Yu no ken givim long em o long mi, katim em long tupela hap.’

King Solomon i stretim wanpela hevi i hatwok long stretim

Nau Solomon i tok: ‘No ken kilim i dai pikinini! Givim em long namba wan meri. Em i mama tru bilong pikinini.’ Solomon i save long dispela, long wanem, mama tru em i laikim tumas dispela bebi na em i orait long givim long narapela meri na bai ol i no ken kilim em i dai. Taim ol manmeri i harim tok long olsem wanem Solomon i bin stretim dispela hevi, ol i amamas long ol i gat kain king olsem.

Taim Solomon i stap king, God i mekim gut long ol manmeri na graun i kamapim planti wit na bali, grep na fik na ol arapela kaikai. Ol manmeri i werim ol gutpela klos na stap long ol gutpela haus. Olgeta man i gat ol gutpela samting na i planti tumas winim skel bilong ol.

1 King 3:3-28; 4:29-34.



Ol askim

  • Jehova i askim Solomon long wanem samting? Solomon i bekim wanem tok?
  • Jehova i amamas long samting Solomon i askim em long en, olsem na em i tok promis long givim wanem samting long Solomon?
  • Tupela meri i kam long Solomon na kamapim wanem hevi i hatwok long stretim?
  • Olsem yu inap lukim long piksa, Solomon i mekim wanem bilong stretim dispela hevi?
  • Taim Solomon i mekim wok king, olsem wanem long i stap bilong ol manmeri? Bilong wanem i olsem?

Sampela askim moa

  • Ritim 1 King 3:3-28.

    Ol man i holim wok insait long oganaisesen bilong God long nau ol inap lainim wanem samting long tok bilong Solomon long 1 King 3:7? (Sng. 119:105; Snd. 3:5, 6)

    Samting em Solomon i askim Jehova long en, olsem wanem dispela i stap olsem gutpela piksa long ol samting i stret long yumi ken beten long en? (1 Kin. 3:9, 11; Snd. 30:8, 9; 1 Jo. 5:14)

    Pasin em Solomon i mekim bilong stretim kros bilong tupela meri i kirapim yumi long bilip tru long wanem samting long wok king bilong Man i Winim Solomon, em Jisas Krais? (1 Kin. 3:28; Ais. 9:6, 7; 11:2-4)

  • Ritim 1 King 4:29-34.

    Solomon i askim Jehova long helpim em long kisim pasin bilong bihainim tok na Jehova i harim beten bilong Solomon na i mekim wanem? (1 Kin. 4:29)

    Taim yumi skelim bikpela hatwok ol man i mekim bilong i go harim ol savetok bilong Solomon, yumi mas i gat wanem tingting long pasin bilong stadi long Tok Bilong God? (1 Kin. 4:29, 34; Jo. 17:3; 2 Ti. 3:16)