Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 53: Tok Promis Bilong Jepta

Stori 53: Tok Promis Bilong Jepta
Pikinini meri bilong Jepta

OLSEM WANEM? Wanpela taim yu bin tok promis long mekim wanpela samting na bihain yu hatwok long truim tok bilong yu? Dispela samting i bin painim Jepta, olsem na em i bel hevi tru. Yu lukim em long dispela piksa? Dispela man em i wanpela strongpela jas bilong Israel.

Jepta i stap taim ol Israel i lusim pinis Jehova. Ol i mekim gen ol pasin nogut. Olsem na Jehova i larim ol Amon i givim hevi long ol. Dispela i mekim na ol Israel i krai long Jehova na tok: ‘Mipela i mekim rong long yu! Plis, helpim mipela!’

Jepta na ol soldia bilong em

Ol Israel i sori long ol pasin nogut ol i mekim. Bilong kamapim klia olsem ol i sori long rong bilong ol, ol i kirap gen long lotuim Jehova. Olsem na Jehova i helpim ol.

Ol i makim Jepta long i go pas long pait long ol man nogut bilong Amon. Jepta i laik tru bai Jehova i helpim em long dispela pait. Olsem na em i tok promis long Jehova olsem: ‘Sapos yu helpim mi long winim ol Amon, orait namba wan man i lusim haus bilong mi na i kam bungim mi long rot taim mi go bek, bai mi givim em long yu.’

Jehova i harim tok promis bilong Jepta, na i helpim em long winim pait. Taim Jepta i go bek long haus, yu save husat i namba wan long kam bungim em long rot? Em pikinini meri bilong em, em i dispela wanpela pikinini tasol bilong Jepta. Jepta i tok: ‘Sori tumas, pikinini bilong mi! Yu givim bikpela bel hevi tru long mi. Tasol mi bin mekim tok promis pinis long Jehova, na mi no inap brukim.’

Taim pikinini meri bilong Jepta i save long dispela tok promis, pastaim em tu i bel hevi. Long wanem, em i mas lusim papa bilong em na ol pren. Na em bai i go mekim wok bilong Jehova long haus lotu bilong em long Silo inap long laip olgeta bilong em. Olsem na em i tokim papa bilong em: ‘Sapos yu bin tok promis pinis long Jehova, orait yu mas mekim olsem yu bin tok.’

Olsem na pikinini meri bilong Jepta i go long Silo, na em i mekim wok bilong Jehova inap long laip olgeta bilong em. Fopela de long olgeta yia, ol meri Israel i save go lukim em na amamas wantaim em. Ol manmeri i laikim pikinini meri bilong Jepta, long wanem, em i gutpela wokmeri bilong Jehova.

Hetman 10:6-18; 11:1-40.



Ol askim

  • Jepta em i husat? Em i stap long wanem taim?
  • Jepta i mekim wanem tok promis long Jehova?
  • Bilong wanem Jepta i bel hevi tru taim em i winim pinis pait wantaim ol Amon na em i go bek long ples?
  • Pikinini meri bilong Jepta i tok wanem taim em i save long tok promis bilong papa bilong em?
  • Bilong wanem ol manmeri i laikim pikinini meri bilong Jepta?

Sampela askim moa

  • Ritim Hetman 10:6-18.

    Pasin bilong ol Israel long i no stap gut long Jehova i givim wanem tok lukaut long yumi? (Het. 10:6, 15, 16; Ro. 15:4; KTH 2:10)

  • Ritim Hetman 11:1-11, 29-40.

    Olsem wanem yumi save, tok bilong Jepta long givim pikinini meri bilong em olsem “wanpela ofa bilong paia i kukim olgeta” i no makim olsem tru tru em bai kukim pikinini long paia? (Het. 11:31; Wkp. 16:24; Lo 18:10, 12)

    Olsem wanem Jepta i givim pikinini meri bilong em olsem ofa?

    Yumi inap lainim wanem samting long pasin bilong Jepta long bihainim tok promis em i mekim long Jehova? (Het. 11:35, 39; Sav. 5:4, 5; Mt. 16:24)

    Olsem wanem pikinini meri bilong Jepta i makim gutpela pasin ol yangpela Kristen i ken bihainim long mekim wok fultaim? (Het. 11:36; Mt. 6:33; Fl. 3:8)