Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 52: Gideon na 300 Man

Stori 52: Gideon na 300 Man

YU LUKIM samting ol man i mekim long dispela piksa? Olgeta i ami bilong Israel. Ol man i brukim skru ol i dring wara. Jas Gideon i sanap klostu long ol. Em i skelim pasin bilong ol long dring wara.

Lukim gut narapela narapela pasin bilong ol long dring wara. Sampela i putim pes i go daun long wara. Tasol wanpela i kisim wara long han na i dring, na bai em inap was i stap. Dispela em i bikpela samting, long wanem, Jehova i tokim Gideon long makim tasol ol man i was i stap taim ol i dring wara. God i tok olgeta arapela i mas i go bek long ples. Bilong wanem God i tok olsem?

Planti hevi i painim gen ol Israel. Dispela samting i kamap, long wanem, ol i no bihainim tok bilong Jehova. Ol Midian i daunim ol na givim hevi long ol. Olsem na ol Israel i krai long Jehova i helpim ol, na Jehova i harim krai bilong ol.

Jehova i tokim Gideon long bungim wanpela ami, olsem na Gideon i bungim 32,000 man. Tasol ami bilong ol birua em inap 135,000 man. Tasol maski i olsem, Jehova i tokim Gideon: ‘Yu gat planti man tumas.’ Bilong wanem Jehova i tok olsem?

Em i tok olsem, long wanem, nogut ol Israel i winim pait na ol i ting ol i win long strong bilong ol yet. Nogut ol i ting i no gat wok long Jehova i helpim ol. Olsem na Jehova i tokim Gideon: ‘Olgeta man i pret, tokim ol long go bek long ples.’ Taim Gideon i mekim olsem, inap 22,000 man i go bek long ples. Nau 10,000 tasol i stap bilong pait wantaim 135,000 birua.

Gideon i traim ol soldia

Tasol harim! Jehova i tok: ‘Yu gat planti man tumas i stap yet.’ Olsem na em i tokim Gideon long salim ol i go dring wara, na olgeta man i putim pes i go daun long wara, em i mas salim ol i go bek long ples. Jehova i tok promis olsem: ‘Mi bai helpim yu long winim pait wantaim dispela 300 man em ol i was i stap taim ol i dring wara.’

Ol i redi nau long i go pait. Gideon i tilim dispela 300 man long tripela lain. Long olgeta wan wan em i givim wanpela biugel, na sospen graun i gat bombom i stap insait long en. Long biknait, ol i go raunim kem bilong ol birua. Nau, long wankain taim, olgeta i winim biugel na brukim sospen, na singaut olsem: ‘Bainat bilong Jehova na bilong Gideon!’ Taim ol birua i kirap, ol i paul na pret. Olgeta i kirap ranawe i go, na ol Israel i winim pait.

Hetman sapta 6 i go 8.



Ol askim

  • Wanem bikpela hevi i painim ol Israel? Bilong wanem dispela hevi i painim ol?
  • Bilong wanem Jehova i tokim Gideon olsem em i gat planti man tumas long ami bilong em?
  • Taim Gideon i tokim ol man i pret long go bek long ples, hamas man tasol i stap?
  • Lukim piksa na stori long olsem wanem Jehova i daunim namba bilong ami bilong Gideon i go inap 300 man tasol.
  • Olsem wanem Gideon i redim dispela 300 man bilong i go mekim pait? Olsem wanem ol Israel i winim pait?

Sampela askim moa

  • Ritim Hetman 6:36-40.

    Gideon i mekim wanem bilong save tru long laik bilong Jehova?

    Long nau, olsem wanem yumi kisim save long laik bilong Jehova? (Snd. 2:3-6; Mt. 7:7-11; 2 Ti. 3:16, 17)

  • Ritim Hetman 7:1-25.

    Yumi inap lainim wanem samting long pasin bilong ol 300 man em ol i bin was i stap na ol man em ol i no bin was i stap? (Het. 7:3, 6; Ro. 13:11, 12; Ef. 5:15-17)

    Ol 300 man i bin lukluk i go long Gideon bilong save long ol samting ol i mas mekim, na olsem wanem yumi ken lain long ol samting yumi mas mekim taim yumi lukluk i go long Man i Winim Gideon, em Jisas Krais? (Het. 7:17; Mt. 11:29, 30; 28:19, 20; 1 Pi. 2:21)

    Olsem wanem dispela hap tok long Hetman 7:21 (NW), “olgeta wan wan i wok long sanap i stap long ples bilong ol yet,” i helpim yumi long i stap amamas long mekim wok insait long oganaisesen bilong Jehova long wanem wanem hap ol i tokim yumi long mekim? (1 Ko. 4:2; 12:14-18; Jem. 4:10)

  • Ritim Hetman 8:1-3.

    Taim yumi laik stretim kros namel long yumi yet na wanpela brata o sista, yumi inap lainim wanem samting long pasin Gideon i mekim bilong stretim kros wantaim lain Efraim? (Snd. 15:1; Mt. 5:23, 24; Lu. 9:48)