Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 48: Savepasin Bilong Ol Gibeon

Stori 48: Savepasin Bilong Ol Gibeon

NAU planti taun bilong Kenan i laik pait long ol Israel. Ol i ting ol inap winim pait. Tasol ol manmeri bilong taun Gibeon ol i no ting olsem. Ol i bilip olsem God i helpim ol Israel, na ol i no laik pait long God. Olsem na yu save ol Gibeon i mekim wanem?

Ol i mekim ol samting na bai ol Israel i ting ol i bilong longwe ples tru. Olsem na sampela man i pasim olpela klos na olpela su. Ol i kisim ol olpela bek i brukbruk na putim long ol donki bilong ol, na ol i kisim sampela olpela bret i drai pinis. Ol i go long Josua na tok: ‘Mipela i kam long wanpela longwe ples tru, long wanem, mipela i harim tok long God bilong yupela. Mipela i harim stori long ol samting em i mekim bilong helpim yupela long Isip. Olsem na ol hetman bilong mipela i tokim mipela long redim sampela kaikai bilong i kam na tokim yupela olsem: “Mipela ol wokboi bilong yupela. Yupela i mas tok promis olsem yupela i no inap pait long mipela.” Yu ken lukim olsem mipela i bin kam longwe tru, olsem na klos bilong mipela i brukbruk na bret bilong mipela i kamap olpela na i drai pinis.’

Josua na ol arapela hetman i bilipim tok bilong ol Gibeon. Olsem na ol i tok promis long ol i no inap pait long ol. Tasol tripela de bihain ol i kisim save olsem ol Gibeon i sindaun klostu long ol.

Josua i askim ol: ‘Bilong wanem yupela i tokim mipela olsem yupela i kam long wanpela longwe ples?’

Ol Gibeon i tok: ‘Mipela i tok olsem, long wanem, mipela i harim olsem God bilong yupela bai givim graun Kenan long yupela. Olsem na mipela i pret nogut yupela i kilim mipela i dai.’ Ol Israel i bihainim tok promis bilong ol, na ol i no kilim i dai ol Gibeon. Ol i mekim ol i kamap wokboi bilong ol.

King bilong Jerusalem i kros, long wanem, ol Gibeon i kamap wanbel wantaim ol Israel. Olsem na em i tokim 4-pela arapela king: ‘Kam na helpim mi long i go pait long ol Gibeon.’ Orait dispela 5-pela king i mekim olsem. Yu ting ol Gibeon i bihainim savepasin long kamap wanbel wantaim ol Israel, na dispela i kirapim ol 5-pela king long i kam pait long ol? Orait, nau bai yumi kisim save long en.

Josua 9:1-27; 10:1-5.

Josua na ol Gibeon


Ol askim

  • Olsem wanem ol manmeri bilong Gibeon i narapela kain long ol lain Kenan i stap long ol taun klostu?
  • Olsem piksa i soim, ol Gibeon i mekim wanem? Bilong wanem ol i mekim olsem?
  • Josua na ol hetman bilong Israel i mekim wanem tok promis long ol Gibeon? Tasol 3-pela de bihain ol i kisim save long wanem samting?
  • Wanem samting i kamap taim ol king bilong ol arapela taun i harim olsem ol Gibeon i kamap wanbel wantaim ol Israel?

Sampela askim moa

  • Ritim Josua 9:1-27.

    Jehova i bin tokim ol Israel long “pinisim tru olgeta manmeri” i stap long graun Kenan, tasol em i larim ol Gibeon i stap na dispela i kamapim klia wanem ol pasin bilong em? (Jos. 9:22, 24; Mt. 9:13; Ap. 10:34, 35; 2 Pi. 3:9)

    Pasin bilong Josua long bihainim tok promis em i bin mekim long ol Gibeon, olsem wanem dispela i stap olsem gutpela piksa ol Kristen long nau i ken bihainim? (Jos. 9:18, 19; Mt. 5:37; Ef. 4:25)

  • Ritim Josua 10:1-5.

    Olsem wanem ol manmeri bilong bikpela lain long nau ol i bihainim pasin bilong ol Gibeon? Dispela i mekim na wanem samting inap painim ol? (Jos. 10:4; Sek. 8:23; Mt. 25:35-40; KTH 12:17)