Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 46: Banis Bilong Jeriko

Stori 46: Banis Bilong Jeriko

WANEM samting i mekim na banis bilong Jeriko i bruk? I luk olsem wanpela bikpela bom i bagarapim. Tasol long dispela taim bipo ol i no gat ol bom; na ol i no gat ol gan tu. Wanpela mirakel bilong Jehova i mekim na banis i bruk! Orait nau yumi ken kisim save long olsem wanem dispela samting i kamap.

Banis bilong Jeriko i pundaun

Harim tok Jehova i mekim long Josua: ‘Yu na ami bilong yu i mas wokabaut raunim dispela taun. Mekim olsem wanpela taim long wanpela de inap sikspela de. Karim bokis kontrak i go wantaim yupela. Sevenpela pris i mas wokabaut i go paslain na winim biugel bilong ol.

‘Long namba seven de yupela i mas wokabaut raunim taun sevenpela taim. Na bihain pulim longpela krai long biugel, na olgeta manmeri i mas singaut strong. Na banis bai bruk olgeta!’

Josua na ol manmeri i mekim samting Jehova i tokim ol long mekim. Taim ol i wokabaut raunim taun, olgeta i stap isi. I no gat man i mekim wanpela tok. Ol inap harim tasol krai bilong biugel na pairap bilong lek. Ating ol birua bilong ol manmeri bilong God long Jeriko ol i pret. Yu inap lukim dispela retpela rop i hangamap long wanpela windo? Em windo bilong husat? Yes, Rahap i mekim samting em tupela man bilong lukstil i bin tokim em long mekim. Olgeta famili bilong em i stap insait wantaim em na ol i lukluk i stap.

Josua

Bihain, long namba seven de, taim ol Israel i wokabaut raunim taun inap sevenpela taim pinis, ol biugel i krai, na ol ami i singaut, na banis i bruk. Nau Josua i tok: ‘Kilim i dai olgeta man long taun na kukim dispela taun. Kukim olgeta samting. Kisim tasol gol, silva, bras, na ain, na givim long haus lotu sel bilong Jehova.’

Long tupela man bilong lukstil, Josua i tok: ‘Go insait long haus bilong Rahap, na bringim em na olgeta famili bilong em i kam.’ Rahap na famili bilong em ol i abrusim bagarap olsem tupela man bilong lukstil i bin tok promis pinis.

Josua 6:1-25.



Ol askim

  • Jehova i tok, inap sikspela de ol ami na pris i mas mekim wanem?
  • Ol i mas mekim wanem long namba seven de?
  • Olsem yu lukim long piksa, wanem samting i kamap long banis bilong Jeriko?
  • Bilong wanem i gat retpela rop i hangamap long windo?
  • Josua i tokim ol ami long mekim wanem long ol manmeri na long taun? Tasol ol i mas mekim wanem long gol, silva, bras, na ain?
  • Josua i tokim tupela man bilong lukstil long mekim wanem?

Sampela askim moa

  • Ritim Josua 6:1-25.

    Pasin ol Israel i mekim long wokabaut raunim taun Jeriko long namba 7 de, olsem wanem dispela i wankain long wok autim tok bilong ol Witnes Bilong Jehova nau long dispela taim bilong las de? (Jos. 6:15, 16; Ais. 60:22; Mt. 24:14; 1 Ko. 9:16)

    Inap olsem 500 yia bihain, olsem wanem tok profet long Josua 6:26 i kamap tru? Dispela i skulim yumi long wanem samting long tok Jehova i mekim? (1 Kin. 16:34; Ais. 55:11)