Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 42: Wanpela Donki i Toktok

Stori 42: Wanpela Donki i Toktok

YU HARIM pinis olsem wanpela donki i bin toktok? Ating bai yu tok: ‘Nogat. Ol animal i no inap toktok.’ Tasol Baibel i stori long wanpela donki i bin toktok. Orait, yumi ken stori long olsem wanem dispela samting i bin kamap.

Wanpela ensel

Ol Israel i redi long i go insait long graun bilong Kenan. Balak, em king bilong Moap, em i pret long ol Israel. Olsem na em i salim tok long wanpela saveman, nem bilong em Balam, long i kam na kolim tok nogut long ol Israel. Balak i tok promis long givim planti mani long Balam, olsem na Balam i kalap long donki na em i go lukim Balak.

Jehova i no laik bai Balam i kolim tok nogut long ol manmeri bilong Em. Olsem na em i salim wanpela ensel i gat longpela bainat bilong i go sanap na pasim rot bilong Balam. Balam i no lukim dispela ensel, tasol donki bilong em i lukim. Olsem na donki i laik abrusim ensel, na bihain em i slip tasol long rot. Balam i kros nogut tru, na em i paitim donki bilong em long stik.

Nau Jehova i mekim na Balam inap harim donki bilong em i toktok long em. Donki i askim olsem: ‘Mi mekim wanem long yu na yu paitim mi?’

Balam sindaun antap long donki

Balam i tok: ‘Yu mekim na mi luk olsem wanpela longlong man. Sapos mi gat bainat, mi bai kilim yu i dai.’

Donki i askim: ‘Bipo mi bin mekim kain pasin olsem long yu?’

Balam i tok: ‘Nogat.’

Nau Jehova i mekim na Balam inap lukim ensel wantaim longpela bainat i sanap i stap long rot. Ensel i tok: ‘Bilong wanem yu paitim donki bilong yu? Mi kam bilong pasim rot bilong yu, long wanem, yu no ken i go kolim tok nogut long ol Israel. Sapos donki bilong yu i no bin abrusim mi, mi bai kilim yu i dai pinis, tasol mi no inap mekim nogut long donki bilong yu.’

Balam i tok: ‘Mi mekim rong. Mi no save olsem yu sanap long rot.’ Ensel i larim Balam i go, na Balam i go lukim Balak. Em i laik kolim yet tok nogut long Israel, tasol Jehova i mekim na tripela taim em i blesim ol Israel.

Namba 21:21-35; 22:1-40; 23:1-30; 24:1-25.



Ol askim

  • Balak em i husat? Bilong wanem em i salim tok long Balam?
  • Bilong wanem donki bilong Balam i slip long rot?
  • Balam i harim donki i tok wanem?
  • Ensel i tok wanem long Balam?
  • Wanem samting i kamap taim Balam i laik kolim tok nogut long ol Israel?

Sampela askim moa

  • Ritim Namba 21:21-35.

    Bilong wanem ol Israel i daunim King Sihon bilong lain Amor na King Ok bilong Basan? (Nam. 21:21, 23, 33, 34)

  • Ritim Namba 22:1-40.

    Wanem astingting i kirapim Balam na em i laik kolim tok nogut long ol Israel? Dispela stori inap skulim yumi long wanem ol samting? (Nam. 22:16, 17; Snd. 6:16, 18; 2 Pi. 2:15; Ju. 11)

  • Ritim Namba 23:1-30.

    Tru Balam i mekim tok olsem man i lotuim Jehova, tasol olsem wanem pasin bilong em i soim olsem em i no lotuim Jehova? (Nam. 23:3, 11-14; 1 Sml. 15:22)

  • Ritim Namba 24:1-25.

    Olsem wanem dispela stori bilong Baibel i strongim bilip bilong yumi olsem Jehova bai kamapim ol samting em i tingting pinis long mekim? (Nam. 24:10; Ais. 54:17)