Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 41: Snek Bras

Stori 41: Snek Bras
Moses na snek bras

DISPELA snek i raunim diwai, yu ting em i snek tru? Nogat. Ol i bin wokim dispela snek long bras. Jehova i tokim Moses long putim snek long diwai na ol manmeri i ken lukim na ol i no ken i dai. Tasol ol narapela snek i stap long graun, ol i snek tru. Ol i kaikaim ol manmeri na mekim ol i sik. Yu save bilong wanem dispela samting i kamap?

Dispela samting i kamap, long wanem, ol Israel i mekim tok nogut long God na Moses. Ol i tok: ‘Bilong wanem yu kisim mipela long Isip na bringim mipela i kam bilong i dai long dispela ples drai nating? I no gat kaikai na wara long hia. Na mipela i les pinis long kaikai mana.’

Tasol mana em i gutpela kaikai. Jehova i wokim mirakel na givim dispela kaikai long ol. Na em i wokim mirakel na givim wara tu long ol. Tasol ol manmeri i no tenkyu long ol samting God i mekim bilong lukautim ol. Olsem na Jehova i salim ol dispela snek nogut bilong givim strafe long ol Israel. Ol snek i kaikaim ol, na planti bilong ol i dai.

Ol snek i kaikaim ol Israel

Bihain ol manmeri i kam long Moses na tok: ‘Mipela i bin mekim rong, long wanem, mipela i bin tok nogut long Jehova na long yu. Beten askim Jehova long rausim ol dispela snek.’

Olsem na Moses i beten bilong helpim ol manmeri. Na Jehova i tokim Moses long wokim dispela snek bras. Em i tokim Moses long putim dispela snek long wanpela diwai, na husat man em snek i kaikaim em, em i mas lukluk i go long en. Moses i mekim stret samting God i tok long en. Na ol manmeri em snek i kaikaim ol, ol i lukluk long dispela snek bras na ol i kamap orait gen.

Dispela inap lainim yumi long wanpela samting. Yumi olgeta i kain olsem ol Israel em snek i kaikaim ol. Yumi olgeta i stap long mak bilong i dai. Lukim ol man, na yu bai lukim olsem ol i wok long i go lapun, kisim sik na i dai. Dispela samting i kamap, long wanem, namba wan man na meri, em Adam na Iv, ol i lusim Jehova, na yumi olgeta i pikinini bilong ol. Tasol Jehova i bin wokim rot na bai yumi inap i stap oltaim.

Jehova i bin salim Pikinini bilong em, Jisas Krais, i kam long graun. Ol i hangamapim Jisas long wanpela diwai, long wanem, planti man i ting em i man nogut. Tasol Jehova i bin salim Jisas bilong helpim yumi. Sapos yumi lukluk long em, olsem bihainim em, yumi inap kisim laip oltaim. Bihain bai yumi kisim sampela save moa long dispela samting.

Namba 21:4-9; Jon 3:14, 15.



Ol askim

  • Long piksa, wanem samting i raunim diwai? Bilong wanem Jehova i tokim Moses long putim dispela samting long diwai?
  • Olsem wanem ol manmeri i no tenkyu long ol samting God i bin mekim bilong helpim ol?
  • Ol manmeri i askim Moses long mekim wanem taim Jehova i salim ol snek nogut bilong givim strafe long ol?
  • Bilong wanem Jehova i tokim Moses long wokim wanpela snek bras?
  • Dispela stori inap skulim yumi long wanem samting?

Sampela askim moa

  • Ritim Namba 21:4-9.

    Pasin bilong ol Israel long toktok planti long ol samting Jehova i bin givim long ol, dispela i givim wanem tok lukaut long yumi? (Nam. 21:5, 6; Ro. 2:4)

    Sampela handet yia bihain, ol Israel i mekim wanem long dispela snek bras? King Hesekia i mekim wanem long dispela? (Nam. 21:9; 2 Kin. 18:1-4)

  • Ritim Jon 3:14, 15.

    Olsem wanem dispela snek bras long diwai i makim Jisas Krais taim ol i nilim em long diwai? (Ga. 3:13; 1 Pi. 2:24)