Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 37: Haus Sel Bilong Mekim Lotu

Stori 37: Haus Sel Bilong Mekim Lotu

YU SAVE dispela haus i bilong mekim wanem? Em i wanpela haus sel bilong lotuim Jehova long en. Ol i kolim tu olsem haus lotu sel. Ol manmeri i bin pinisim dispela haus sel inap wanpela yia bihain long ol i lusim Isip. Yu save husat i bin tokim ol long wokim?

Haus lotu sel

Jehova i tokim ol. Taim Moses i stap antap long maunten Sainai, Jehova i tokim em long pasin bilong wokim dispela haus lotu sel. Em i tok, ol i mas wokim bambai ol inap sanapim o brukim kwiktaim. Long dispela rot ol inap karim ol hap bilong en i go long narapela ples na sanapim gen. Olsem na taim ol Israel i wokabaut long ples drai nating, ol i karim haus lotu sel i go wantaim ol.

Sapos yu lukluk insait long liklik rum long arere bilong haus sel, yu inap lukim wanpela bokis. Dispela em i bokis kontrak. I gat tupela ensel ol i bin wokim long gol i stap antap long en. God i raitim gen Tenpela Lo long tupela hap ston, long wanem, Moses i bin brukim tupela hap ston em i bin givim long em pastaim. Ol i putim dispela tupela hap ston i go insait long bokis kontrak. Na tu, ol i putim wanpela sospen i gat mana long en. Yu inap tingim, mana em wanem samting?

Aron, em brata bilong Moses, em man Jehova i makim bilong kamap hetpris. Em i stap olsem gopas bilong ol manmeri long lotuim Jehova. Ol pikinini man bilong em tu ol i mekim wok pris.

Orait, nau lukluk long bikpela rum bilong dispela haus sel. Em i bikpela moa long liklik rum, olsem dabol. Yu lukim wanpela liklik bokis, em smok i kamap long en? Dispela em i alta ol pris i save kukim sanda long en, em wanpela samting i gat gutpela smel. Na i gat wanpela lam i stap, em i gat 7-pela han. Na namba tri samting long dispela rum em wanpela tebol. Antap long en i gat 12-pela bret.

Insait long banis bilong haus lotu sel i gat wanpela bikpela dis i pulap long wara. Ol pris i save yusim wara bilong waswas. Na tu, i gat bikpela alta i stap. Ol i save kilim ol animal na kukim long dispela alta olsem ofa long Jehova. Ol i sanapim haus lotu sel namel stret long ol haus sel bilong ol Israel.

Kisim Bek 25:8-40; 26:1-37; 27:1-8; 28:1; 30:1-10, 17-21; 34:1, 2; Hibru 9:1-5.



Ol askim

  • Wanem nem bilong dispela haus yu lukim long piksa? Dispela haus i bilong mekim wanem?
  • Bilong wanem Jehova i tokim Moses long wokim haus sel na bai ol inap sanapim o brukim kwiktaim?
  • Dispela bokis i stap long liklik rum long arere bilong haus sel em i wanem samting? Wanem ol samting i stap insait long en?
  • Jehova i makim husat long kamap hetpris? Wanem wok bilong hetpris?
  • Kolim dispela tripela samting i stap long bikpela rum bilong haus sel.
  • Wanem tupela samting i stap insait long banis bilong haus lotu sel? Ol i save yusim ol dispela samting bilong mekim wanem?

Sampela askim moa

  • Ritim Kisim Bek 25:8-40; 26:1-37; 27:1-8; na 28:1.

    Tupela ensel antap long “Bokis Kontrak” i makim wanem samting? (Kis. 25:20, 22; Nam. 7:89; 2 Kin. 19:15)

  • Ritim Kisim Bek 30:1-10, 17-21; 34:1, 2; na Hibru 9:1-5.

    Bilong wanem Jehova i tokim ol pris i mekim wok long haus lotu sel long ol i mas i stap klin long skin? Dispela i mas mekim wanem long yumi long nau? (Kis. 30:18-21; 40:30, 31; Hi. 10:22)

    Long taim aposel Pol i raitim pas long ol Kristen Hibru, olsem wanem em i kamapim olsem haus lotu sel na kontrak bilong Lo i no gat strong moa? (Hi. 9:1, 9; 10:1)