Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 34: Nupela Kain Kaikai

Stori 34: Nupela Kain Kaikai

YU SAVE ol manmeri i wok long kisim wanem samting long graun? Dispela samting i olsem ais. Em i waitpela, na i flet. Tasol em i no ais, nogat, em i wanpela kain kaikai.

Ol Israel i kisim mana

Ol Israel i lusim Isip inap wanpela mun pinis. Ol i stap long ples drai nating. I no gat planti kaikai, olsem na ol manmeri i toktok planti na tok: ‘Gutpela sapos Jehova i bin kilim yumi i dai long Isip. Long Isip yumi gat planti kain kaikai inap long pinisim laik bilong yumi.’

Olsem na Jehova i tok: ‘Mi bai mekim kaikai i kam daun olsem ren.’ Na Jehova i mekim olsem em i bin tok. Long de bihain taim ol Israel i lukim dispela waitpela samting i bin kam daun olsem ren, ol i tok: ‘Em wanem samting?’

Moses i tok: ‘Em kaikai Jehova i givim long yupela.’ Ol i kolim MANA. Swit bilong en i olsem ol liklik kek ol i wokim wantaim hani.

Moses i tokim ol manmeri: ‘Yupela i mas kisim inap long skel bilong yupela olgeta wan wan.’ Olsem na long olgeta moningtaim ol i save mekim olsem. Na taim san i kamap bikpela, hap mana i stap yet i save go wara wara na i pinis.

Moses i tok tu olsem: ‘Yupela i no ken bungim sampela mana i stap bilong de bihain.’ Tasol sampela manmeri i no harim tok. Yu save wanem samting i kamap? Long moningtaim bilong de bihain ol liklik snek i pulap long mana ol i bin bungim, na mana i sting!

Tasol i gat wanpela de bilong wik em Jehova i tokim ol long bungim mana inap long skel bilong tupela de. Dispela em long namba siks de. Jehova i tokim ol Israel long bungim sampela mana bilong de antap, long wanem, em i no inap salim mana i kam long namba seven de. Taim ol i bungim mana bilong namba seven de na putim i stap, ol liklik snek i no save pulap long en na i no sting! Dispela tu em i wanpela mirakel!

Long olgeta dispela yia ol Israel i stap long ples drai nating, Jehova i lukautim ol long mana.

Kisim Bek 16:1-36; Namba 11:7-9; Josua 5:10-12.



Ol askim

  • Long piksa, ol manmeri i wok long kisim wanem samting long graun? Ol i kolim dispela samting olsem wanem?
  • Moses i givim wanem tok long ol manmeri long pasin bilong kisim mana?
  • Jehova i tokim ol manmeri long mekim wanem long namba 6 de? Bilong wanem?
  • Jehova i wokim wanem mirakel taim ol i bungim mana bilong namba 6 de na larim i stap inap long namba 7 de?
  • Inap hamas yia Jehova i lukautim ol manmeri long mana?

Sampela askim moa

  • Ritim Kisim Bek 16:1-36 na Namba 11:7-9.

    Kisim Bek 16:8 i tok wanem na dispela i soim olsem yumi mas rispektim ol man God i makim bilong mekim wok insait long kongrigesen Kristen? (Hi. 13:17)

    Long ples drai nating, wanem samting i save kamap na long olgeta de dispela i kirapim ol Israel long tingim olsem Jehova tasol inap lukautim ol? (Kis. 16:14-16, 35; Lo 8:2, 3)

    Jisas i tok mana i olsem piksa bilong wanem samting? Dispela “bret bilong heven” i helpim yumi olsem wanem? (Jo. 6:31-35, 40)

  • Ritim Josua 5:10-12.

    Ol Israel i kaikai mana inap hamas yia? Olsem wanem dispela i traim ol? Dispela stori inap skulim yumi long wanem samting? (Kis. 16:35; Nam. 11:4-6; 1 Ko. 10:10, 11)