Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 33: Ol i Brukim Solwara Retsi

Stori 33: Ol i Brukim Solwara Retsi

LUKIM samting i kamap! Moses i holim stik na taitim han bilong em i go long solwara Retsi. Ol manmeri i stap wantaim em, em ol Israel. Tasol Fero na olgeta ami bilong em ol i bagarap long solwara. Yumi ken stori long olsem wanem dispela samting i kamap.

Solwara i daunim ol ami bilong Isip na ol i dai

Olsem yumi bin stori pinis, Fero i tokim ol Israel long lusim Isip taim God i kamapim namba ten hevi long ol Isip. Inap 600,000 man Israel na planti meri na pikinini tu ol i lusim Isip. Na tu, planti arapela manmeri em ol i bilip long Jehova, ol tu i go wantaim ol Israel. Olgeta i kisim ol sipsip na meme na bulmakau bilong ol i go wantaim ol.

Paslain long ol i lusim Isip, ol Israel i askim ol Isip long givim laplap na ol samting ol i bin wokim long gol na silva. Dispela namba ten hevi i mekim ol Isip i pret nogut tru. Olsem na ol i givim olgeta samting ol Israel i askim ol long en.

Ol Israel i wokabaut inap sampela de na ol i kamap long solwara Retsi. Ol i malolo long dispela hap. Tasol Fero na lain bilong em i bel hevi tru long ol i bin salim ol Israel i go. Ol i tok: ‘Yumi mekim kranki pasin tru. Yumi rong tru long larim ol wokboi bilong yumi i go!’

Olsem na Fero i senisim gen tingting bilong em. Kwiktaim em i redim ol ami na karis bilong em. Orait nau em i bihainim ol Israel i go wantaim 600 karis na olgeta arapela karis bilong Isip.

Taim ol Israel i lukim Fero na ami bilong em i bihainim ol i kam, ol i pret nogut tru. I no gat rot bilong ranawe. Solwara Retsi i stap long fran bilong ol, na ol Isip i kam long baksait. Tasol Jehova i putim bikpela smok namel long lain bilong em na ol Isip. Olsem na ol Isip i no inap lukim ol Israel na pait long ol.

Nau Jehova i tokim Moses long holim stik bilong em na taitim han i go long solwara Retsi. Taim Moses i mekim olsem, Jehova i kirapim strongpela win i kam long hap bilong sankamap. Solwara i bruk i go tupela hap, na sanap long sait sait olsem banis.

Orait nau ol Israel i bihainim rot i stap namel long solwara na wokabaut i go long hapsait. Ating planti aua i lus, long wanem, ol i bikpela lain tru na ol i gat planti animal samting. Bihain ol Isip inap lukim gen ol Israel. Ol wokboi bilong ol i ranawe! Olsem na ol i spit i go daun long solwara na bihainim ol.

Taim ol i mekim olsem, God i mekim na ol wil bilong ol karis bilong ol i lus. Ol Isip i pret nogut tru na ol i singaut olsem: ‘Jehova i helpim ol Israel na em i pait long yumi. Yumi go bek!’ Tasol ol i no gat taim bilong i go bek.

Em long dispela taim God i tokim Moses long taitim stik bilong em i go long solwara, olsem yu lukim long piksa. Na taim Moses i mekim olsem, solwara i bin sanap olsem banis long sait sait i bruk i kam daun na karamapim ol Isip na ol karis bilong ol. Olgeta ami bilong Isip i bin bihainim ol Israel na i go namel long solwara. Na i no gat wanpela bilong ol i abrusim bagarap!

Olgeta manmeri long lain bilong God ol i amamas tru long ol i bin abrusim bagarap! Ol man i mekim wanpela singsing bilong tok tenkyu long Jehova, na ol i tok: ‘Jehova i winim pait na kisim biknem. Em i tromoi ol hos wantaim ol soldia i go daun long solwara.’ Susa bilong Moses, em Miriam, em i kisim tambarin bilong em, na olgeta meri i bihainim em. Ol i amamas na mekim wankain singsing olsem ol man i mekim, na ol i tok: ‘Jehova i winim pait na kisim biknem. Em i tromoi ol hos wantaim ol soldia i go daun long solwara.’

Kisim Bek sapta 12 i go 15.



Ol askim

  • Hamas man, meri, na pikinini bilong Israel i lusim Isip? Husat i go wantaim ol?
  • Fero i kisim wanem tingting taim em i larim ol Israel i go pinis? Em i mekim wanem?
  • Jehova i mekim wanem bilong pasim ol Isip na bai ol i no ken pait long ol manmeri bilong em?
  • Wanem samting i kamap taim Moses i holim stik na taitim han i go long solwara Retsi? Ol Israel i mekim wanem?
  • Wanem samting i kamap taim ol Isip i spit i go daun long solwara na bihainim ol Israel i go?
  • Ol Israel i mekim wanem bilong soim olsem ol i amamas na tenkyu long Jehova i helpim ol long abrusim bagarap?

Sampela askim moa

  • Ritim Kisim Bek 12:33-36.

    Jehova i mekim wanem na lain bilong em i kisim pe long ol i bin i stap wokboi nating bilong ol Isip inap planti yia? (Kis. 3:21, 22; 12:35, 36)

  • Ritim Kisim Bek 14:1-31.

    Tok bilong Moses long Kisim Bek 14:13, 14 i mekim wanem long ol wokboi bilong Jehova long nau taim ol i wetim pait bilong Armagedon i kamap? (2 Sto. 20:17; Sng. 91:8)

  • Ritim Kisim Bek 15:1-8, 20, 21.

    Bilong wanem ol wokboi bilong Jehova i mas singim ol song bilong litimapim nem bilong em? (Kis. 15:1, 2; Sng. 105:2, 3; KTH 15:3, 4)

    Long solwara Retsi, Miriam na ol arapela meri i mekim wanem bilong litimapim nem bilong Jehova na ol meri Kristen long nau i ken bihainim dispela pasin? (Kis. 15:20, 21; Sng. 68:11)