Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 30: Diwai i Paia

Stori 30: Diwai i Paia

MOSES i kam long maunten Horep bilong painim gras bilong ol sipsip i ken kaikai. Long dispela hap em i lukim paia i kamap long wanpela diwai, tasol paia i no kukim diwai!

Moses i nildaun klostu long diwai i paia

Moses i tingting: ‘Dispela i narapela kain samting. Bai mi go klostu moa na lukim gut.’ Taim em i go klostu, em i harim wanpela nek long paia i tok: ‘Yu no ken i kam klostu moa. Rausim su bilong yu, long wanem, dispela graun yu sanap long en, em i holi.’ God i toktok long rot bilong wanpela ensel, olsem na Moses i karamapim pes bilong em.

Orait, nau God i tok: ‘Mi lukim hevi bilong ol manmeri bilong mi long Isip. Olsem na mi salim yu i go na yu mas kisim lain bilong mi na ol i ken lusim Isip.’ Jehova i laik bringim lain bilong em i go long gutpela graun bilong Kenan.

Tasol Moses i tok: ‘Mi no gat nem. Olsem wanem bai mi inap mekim dispela samting? Tasol sapos mi go, ol Israel bai tok, “Husat i salim yu?” Orait bai mi tok wanem?’

God i tok: ‘Yu mas tok olsem: “JEHOVA, em God bilong Abraham na God bilong Aisak na God bilong Jekop, em i bin salim mi i kam long yupela.” ’ Na Jehova i tok moa olsem: ‘Dispela em i nem bilong mi oltaim oltaim.’

Moses i tok: ‘Tasol olsem wanem sapos ol i no bilipim tok bilong mi taim mi tok olsem yu bin salim mi i go?’

God i askim em: ‘Wanem samting i stap long han bilong yu?’

Moses i tok: ‘Wanpela stik.’

God i tok: ‘Tromoi dispela stik i go daun long graun.’ Taim Moses i mekim olsem, stik i tanim i kamap snek. Orait Jehova i wokim narapela mirakel. Em i tok: ‘Putim han i go insait long saket bilong yu.’ Moses i mekim olsem na taim em i rausim, han i kamap waitpela olsem ais! Han i luk olsem bilong wanpela man i gat sik lepra. Na Jehova i givim strong long Moses bilong wokim namba tri mirakel. Orait nau em i tok: ‘Taim yu wokim ol dispela mirakel, ol Israel bai bilip olsem mi bin salim yu i go.’

Moses i go long haus na em i tokim Jetro: ‘Larim mi i go bek long ol lain bilong mi long Isip na lukim sindaun bilong ol i olsem wanem.’ Olsem na Jetro i tok gutbai long Moses, na Moses i wokabaut i go bek long Isip.

Kisim Bek 3:1-22; 4:1-20.



Ol askim

  • Wanem nem bilong dispela maunten long piksa?
  • Stori long narapela kain samting Moses i lukim taim em i go long maunten wantaim ol sipsip bilong em.
  • Wanpela nek long diwai i paia i tok wanem? Em nek bilong husat?
  • Taim God i tokim Moses long em bai kisim ol manmeri bilong God i go lusim Isip, Moses i tok wanem?
  • God i tokim Moses long tok wanem sapos ol manmeri i askim em long husat i salim em?
  • Olsem wanem Moses inap kamapim klia olsem God i salim em?

Sampela askim moa

  • Ritim Kisim Bek 3:1-22.

    Olsem wanem samting i kamap long Moses i strongim yumi olsem sapos yumi pilim olsem yumi no inap long mekim wanpela wok bilong God, Jehova bai helpim yumi? (Kis. 3:11, 13; 2 Ko. 3:5, 6)

  • Ritim Kisim Bek 4:1-20.

    Long dispela 40 yia em Moses i stap long Midian, wanem senis i kamap long pasin bilong em? Ol man i laik winim ol mak bilong mekim wok insait long kongrigesen, ol inap lainim wanem samting long dispela? (Kis. 2:11, 12; 4:10, 13; Mai. 6:8; 1 Ti. 3:1, 6, 10)

    Taim Jehova i stretim yumi long rot bilong oganaisesen bilong em, samting i painim Moses inap strongim yumi olsem wanem? (Kis. 4:12-14; Sng. 103:14; Hi. 12:4-11)