Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 29: Bilong Wanem Moses i Ranawe?

Stori 29: Bilong Wanem Moses i Ranawe?

LUKIM Moses i ranawe lusim Isip. Yu lukim ol man i ranim em i go? Yu save bilong wanem ol i laik kilim Moses i dai? Orait, yumi ken stori long dispela.

Moses i ranawe lusim Isip

Moses i go bikpela long haus bilong Fero, em king bilong Isip. Em i kamap man i gat biknem, na em i gat gutpela tingting na save. Moses i save olsem em i no bilong lain Isip. Papamama tru bilong em ol i bilong lain Israel.

Taim Moses i gat 40 krismas, em i tingting long i go lukim lain bilong em i stap olsem wanem. Em i lukim ol Isip i mekim nogut tru long ol. Em i lukim wanpela Isip i paitim nogut tru wanpela Israel. Moses i lukluk raun na taim em i lukim olsem i no gat man i lukluk, em i paitim dispela man Isip na em i dai. Moses i haitim bodi bilong em long wesan.

Long de bihain Moses i go bek gen long lukim ol lain bilong em. Em i ting em inap helpim ol na bai ol i no ken i stap wokboi moa. Tasol em i lukim tupela man Israel i pait, olsem na Moses i tokim dispela man i gat rong, olsem: ‘Bilong wanem yu paitim brata bilong yu?’

Dispela man i tok: ‘Husat i putim yu i stap hetman na jas bilong mipela? Yu laik kilim mi i dai olsem yu bin kilim i dai dispela man Isip?’

Orait nau Moses i pret. Em i save olsem ol man i painimaut pinis long samting em i bin mekim long dispela man Isip. Fero tu i harim tok long dispela samting na em i salim ol man i go bilong kilim i dai Moses. Olsem na Moses i mas ranawe lusim Isip.

Taim Moses i lusim Isip, em i go longwe long hap bilong Midian. Long Midian em i bungim famili bilong Jetro, na em i maritim wanpela pikinini meri bilong Jetro, em Sipora. Moses i kamap wasman bilong ol sipsip na em i lukautim ol sipsip bilong Jetro. Inap 40 yia em i stap long Midian. Nau em i gat 80 krismas. Orait, wanpela taim em i stap lukautim ol sipsip bilong Jetro, na wanpela narapela kain samting i kamap na i senisim i stap bilong Moses. Yumi ken lukim wanem samting i bin kamap.

Kisim Bek 2:11-25; Aposel 7:22-29.



Ol askim

  • Moses i go bikpela long we? Tasol em i save long wanem samting bilong papamama bilong em?
  • Moses i mekim wanem taim em i gat 40 krismas?
  • Moses i tok wanem long wanpela man Israel i paitim narapela? Dispela man i bekim wanem tok?
  • Bilong wanem Moses i ranawe lusim Isip?
  • Moses i ranawe i go we? Em i bungim husat long dispela hap?
  • Long dispela 40 yia bihain long taim Moses i ranawe long Isip, em i mekim wanem wok?

Sampela askim moa

  • Ritim Kisim Bek 2:11-25.

    Maski Moses i bin skul inap planti yia long save bilong ol Isip, olsem wanem em i soim olsem em i stap gut long Jehova na lain bilong em? (Kis. 2:11, 12; Hi. 11:24)

  • Ritim Aposel 7:22-29.

    Yumi ken lain long wanem samting long pasin bilong Moses long em yet i traim long helpim ol Israel long lusim kalabus long Isip? (Ap. 7:23-25; 1 Pi. 5:6, 10)