Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 28: Moses i No Bagarap

Stori 28: Moses i No Bagarap

LUKIM dispela liklik bebi i krai, na em i holim pinga bilong dispela meri. Em Moses. Yu save dispela naispela meri em i husat? Em i pikinini meri bilong king bilong Isip, em Fero.

Pikinini meri bilong Fero i painim Moses

Mama bilong Moses i bin haitim bebi bilong em inap tripela mun, long wanem, em i no laik bai ol Isip i kilim em i dai. Tasol em i save olsem ol bai painim Moses, olsem na em i mekim samting bilong helpim Moses long abrusim bagarap.

Em i kisim wanpela basket na pasim gut ol hul long en na bai wara i no ken i go insait. Bihain em i putim Moses insait long basket na putim basket namel long ol longpela gras long wara Nail. Em i tokim susa bilong Moses, em Miriam, long was i stap na lukim wanem samting bai kamap.

I no longtaim na pikinini meri bilong Fero i kam bilong waswas long wara Nail. Wantu em i lukim dispela basket insait long ol gras. Em i tokim wanpela wokmeri bilong em: ‘Go na kisim dispela basket i kam long mi.’ Taim em i opim basket, em i lukim wanpela naispela bebi! Bebi Moses i krai, na pikinini meri bilong Fero i sori long em. Em i no laik bai ol i kilim i dai dispela bebi.

Nau Miriam i go klostu. Yu inap lukim em long piksa. Miriam i askim pikinini meri bilong Fero: ‘Yu laik bai mi go singautim wanpela meri Israel bilong lukautim bebi bilong yu?’

Pikinini meri bilong Fero i tok: ‘Plis mekim olsem.’

Olsem na Miriam i ran hariap i go bilong tokim mama bilong em. Taim mama bilong Moses i kamkamap, pikinini meri bilong Fero i tok: ‘Yu kisim dispela bebi na lukautim em na bai mi givim pe long yu.’

Olsem na mama bilong Moses i lukautim bebi bilong em yet. Bihain taim Moses i bikpela liklik, mama bilong em i bringim em i go long pikinini meri bilong Fero husat i adoptim em olsem pikinini bilong em yet. Olsem na Moses i kamap bikpela long haus bilong Fero yet.

Kisim Bek 2:1-10.



Ol askim

  • Dispela bebi long piksa em i husat? Em i holim pinga bilong husat?
  • Mama bilong Moses i mekim wanem bilong helpim Moses na bai ol birua i no ken kilim em i dai?
  • Dispela liklik meri long piksa em i husat? Em i mekim wanem?
  • Taim pikinini meri bilong Fero i lukim bebi, Miriam i tokim em long mekim wanem?
  • Pikinini meri bilong Fero i tok wanem long mama bilong Moses?

Sampela askim moa

  • Ritim Kisim Bek 2:1-10.

    Olsem wanem rot i op na mama bilong Moses inap skulim Moses taim em i liklik yet? Olsem wanem ol papamama long nau i ken bihainim dispela pasin? (Kis. 2:9, 10; Lo 6:6-9; Snd. 22:6; Ef. 6:4; 2 Ti. 3:15)