LONG dispela piksa yu ken lukim sampela man i fosim ol arapela long wok. Lukim dispela man i yusim wip long paitim narapela! Ol dispela man i wok ol i lain bilong Jekop, em lain Israel. Na ol man i fosim ol long wok em ol lain Isip. Lain Israel i bin kamap ol wokboi nating bilong ol Isip. Dispela samting i bin kamap olsem wanem?

Ol Isip i mekim nogut long lain Israel

Inap planti yia, lain bilong Jekop i sindaun gut long Isip. Josep, em i bikman na i stap nambatu long Fero, em i lukautim ol. Tasol bihain Josep i dai. Na nupela Fero i kamap king long Isip, em i no laikim ol Israel.

Olsem na dispela king nogut i mekim ol Israel i kamap wokboi nating. Em i makim ol man i gat hatpela pasin long bosim ol. Ol i fosim ol Israel long wok hat long sanapim ol taun bilong Fero. Tasol lain Israel i wok yet long i go bikpela tru. Bihain liklik ol Isip i pret olsem nogut ol Israel i kamap planti tumas na strong moa, winim ol Isip.

Ol Isip i mekim nogut long lain Israel

Yu save Fero i bin mekim wanem? Em i toktok long ol meri i save helpim ol meri Israel taim ol i karim pikinini, na em i tok: ‘Yupela i mas kilim i dai olgeta pikinini man.’ Tasol ol dispela meri ol i gutpela meri na ol i no kilim i dai ol pikinini man.

Olsem na Fero i putim lo long olgeta manmeri bilong em olsem: ‘Kisim olgeta pikinini man bilong ol Israel na kilim ol i dai. Larim ol pikinini meri tasol i stap.’ Em lo nogut, a? Nau yumi ken stori long olsem wanem wanpela pikinini man i bin abrusim bagarap.

Kisim Bek 1:6-22.



Ol askim

  • Long piksa, man i holim wip em i husat? Em i paitim husat?
  • Taim Josep i dai pinis, wanem samting i kamap long ol Israel?
  • Bilong wanem ol Isip i pret long ol Israel?
  • Fero i tok wanem long ol meri i save helpim ol meri Israel taim ol i karim pikinini?

Sampela askim moa

  • Ritim Kisim Bek 1:6-22.

    Olsem wanem Jehova i kirap long truim tok promis em i bin mekim long Abraham? (Kis. 1:7; Stt. 12:2; Ap. 7:17)

    Olsem wanem tupela meri Hibru husat i save helpim ol meri taim ol i karim pikinini, ol i kamapim olsem ol i tingim laip em samting i holi? (Kis. 1:17; Stt. 9:6)

    Olsem wanem Jehova i mekim gut long dispela tupela meri long pasin bilong ol long i stap gut long em? (Kis. 1:20, 21; Snd. 19:17)

    Olsem wanem Satan i laik pasim samting Jehova i tingting pinis long mekim long rot bilong Krais, em man bai kamap long lain bilong Abraham? (Kis. 1:22; Mt. 2:16)