Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 18: Jekop i Go Long Haran

Stori 18: Jekop i Go Long Haran

YU SAVE long ol dispela man Jekop i toktok wantaim ol? Jekop i wokabaut inap planti de pinis na em i bungim ol long wanpela hul wara. Ol i wok long lukautim ol sipsip bilong ol. Jekop i askim ol: ‘Yupela bilong we?’

Ol i tok: ‘Haran.’

Jekop i tok: ‘Yupela i save long Laban?’

Ol i tok: ‘Yes. Lukim! Pikinini meri bilong em, Resel, i kam nau wantaim lain sipsip bilong em.’ Yu inap lukim Resel i wokabaut i kam?

Jekop i bungim Resel

Taim Jekop i lukim Resel i kam wantaim ol sipsip bilong ankol bilong em Laban, em i go rausim ston long ai bilong hul wara na bai ol sipsip inap dring wara. Orait nau Jekop i givim kis long Resel na tokim em long em i husat. Resel i amamas nogut tru na em i go long haus na tokim papa bilong em Laban.

Laban i amamas tru long Jekop i stap wantaim em. Na taim Jekop i askim em long maritim Resel, Laban i amamas. Tasol em i tokim Jekop long wok inap sevenpela yia pastaim na bai em i ken kisim Resel. Jekop i laikim tumas Resel, olsem na em i mekim olsem. Tasol long taim bilong maritim Resel, yu save wanem samting i bin kamap?

Laban i givim namba wan pikinini meri bilong em, Lea, long Jekop. Jekop i orait long wok sevenpela yia moa long Laban, na Laban i givim Resel tu long em. Long dispela taim bipo God i orait long ol man i ken kisim tupela meri. Tasol long nau, olsem Baibel i tok, man i mas i gat wanpela meri tasol.

Stat 29:1-30.



Ol askim

  • Dispela yangpela meri long piksa em i husat? Jekop i mekim wanem bilong helpim em?
  • Jekop i orait long mekim wanem na bai em i ken maritim Resel?
  • Long taim bilong Jekop long maritim Resel, Laban i mekim wanem?
  • Bilong kisim Resel olsem meri bilong em, Jekop i orait long mekim wanem?

Sampela askim moa

  • Ritim Stat 29:1-30.

    Maski Laban i trikim Jekop, olsem wanem Jekop i bihainim yet stretpela pasin? Dispela inap skulim yumi long wanem samting? (Stt. 29:26-28; Mt. 5:37)

    Olsem wanem Jekop i soim olsem pasin bilong laikim tru meri em i narapela long pasin bilong bel i kirap nating? (Stt. 29:18, 20, 30; Sol. 8:6)

    Husat 4-pela meri i kamap famili bilong Jekop na ol i karim ol pikinini man long em? (Stt. 29:23, 24, 28, 29)