Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 13: Abraham—Pren Bilong God

Stori 13: Abraham—Pren Bilong God

WANPELA ples ol man i go i stap long en bihain long Bikpela Tait em Ur. Ur i kamap bikpela taun na i gat ol gutpela haus i stap long en. Tasol ol man bilong dispela taun i save lotuim ol god giaman, olsem ol i bin mekim long Babel. Ol man bilong Ur na Babel ol i no kain olsem Noa na pikinini bilong em, Siem. Tupela i lotuim Jehova.

Inap 350 yia bihain long tait, gutpela man Noa i dai. Tupela yia bihain long dispela, mama i karim dispela man yu lukim long piksa. God i laikim tru dispela man. Nem bilong em Abraham. Abraham i stap wantaim famili bilong em long taun Ur.

Abraham i lukluk long ol sta

Wanpela taim Jehova i tokim Abraham: ‘Yu mas lusim Ur na lain bilong yu, na i go long wanpela hap mi bai soim long yu.’ Yu ting Abraham i bihainim tok bilong God na lusim gutpela sindaun bilong em long Ur? Yes, em i bihainim tok bilong God. Oltaim Abraham i save bihainim tok bilong God, olsem na em i kamap pren bilong God.

Sampela long famili bilong Abraham ol i go wantaim em taim em i lusim Ur. Papa bilong em, Tera, na Lot, em pikinini bilong brata bilong em, na meri bilong Abraham, em Sara. Bihain ol i go kamap long wanpela ples ol i kolim Haran, na Tera i dai long dispela hap. Ol i stap longwe tru long Ur.

Bihain liklik, Abraham na famili bilong em i lusim Haran na ol i go kamap long kantri ol i kolim Kenan. Long dispela hap Jehova i tok: ‘Mi laik givim dispela graun long lain bilong yu.’ Abraham i stap long Kenan na em i sindaun long ol haus sel.

God i helpim Abraham na em i kisim ol bikpela lain sipsip na kamel samting na planti handet wokboi. Tasol Abraham na Sara, tupela i no gat pikinini.

Taim Abraham i gat 99 krismas, Jehova i tok: ‘Mi tok promis long yu, bai lain pikinini bilong yu i kamap planti.’ Tasol dispela samting bai kamap olsem wanem? Abraham na Sara i lapun pinis na ol i no inap kamapim pikinini.

Stat 11:27-32; 12:1-7; 17:1-8, 15-17; 18:9-19.



Ol askim

  • Wanem kain manmeri i stap long taun Ur?
  • Dispela man long piksa em i husat? Mama i karim em long wanem taim? Em i stap we?
  • Jehova i tokim Abraham long mekim wanem?
  • Bilong wanem Baibel i kolim Abraham olsem pren bilong God?
  • Husat i go wantaim Abraham taim em i lusim Ur?
  • Jehova i tok wanem long Abraham taim em i kamap long graun Kenan?
  • Jehova i mekim wanem tok promis long Abraham taim em i gat 99 krismas?

Sampela askim moa

  • Ritim Stat 11:27-32.

    Olsem wanem Abraham na Lot ol i wanblut? (Stt. 11:27)

    Tru Baibel i tok Tera i kisim famili bilong em na ol i go long Kenan, tasol olsem wanem yumi save Abraham i bin mekim dispela samting? Bilong wanem Abraham i mekim olsem? (Stt. 11:31; Ap. 7:2-4)

  • Ritim Stat 12:1-7.

    Taim Abraham i kamap pinis long graun Kenan, Jehova i skruim wanem tok moa long kontrak bilong Abraham? (Stt. 12:7)

  • Ritim Stat 17:1-8, 15-17.

    Taim Abram i gat 99 krismas, em i kisim wanem nupela nem? Bilong wanem em i kisim dispela nem? (Stt. 17:5)

    Jehova i tok promis long Sara long wanem ol blesing bai kamap bihain? (Stt. 17:15, 16)

  • Ritim Stat 18:9-19.

    Olsem Stat 18:19 i tok, ol papa i kisim wanem wok? (Lo 6:6, 7; Ef. 6:4)

    Wanem samting i kamap long Sara na dispela i soim olsem yumi no inap haitim wanpela samting long Jehova? (Stt. 18:12, 15; Sng. 44:21)