Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 8: Ol Traipela Man Long Graun

Stori 8: Ol Traipela Man Long Graun

SAPOS wanpela man i wokabaut i kam long yu na em i longpela man i go antap inap olsem wanpela haus, bai yu ting olsem wanem? Ating bai yu kirap nogut, long wanem, em i traipela man. Long bipo i gat sampela traipela man i stap long graun. Baibel i tok ol ensel bilong heven i papa bilong ol dispela traipela man. Tasol dispela samting inap kamap olsem wanem?

Ol traipela man bilong mekim pasin nogut

Tingim, dispela ensel nogut Satan i wok strong long kamapim hevi. Em i laik pulim ol ensel bilong God tu long mekim pasin nogut. Bihain, sampela ensel i kirap bihainim Satan. Ol i lusim wok God i makim bilong ol long heven. Na ol i kam daun long graun na tanim i kamap man. Yu save bilong wanem ol i mekim olsem?

Baibel i tok, ol i lukim ol naispela meri bilong graun na ol i laik stap wantaim ol. Olsem na ol i kam daun long graun bilong maritim ol dispela meri. Baibel i tok dispela pasin i no stret, long wanem, God i wokim ol ensel bilong i stap long heven.

Taim ol dispela ensel wantaim meri bilong ol i kamapim pikinini, ol pikinini i narapela kain. Ating pastaim ol i luk wankain olsem ol arapela pikinini. Tasol bihain ol i kamap ol traipela strongpela man.

Ol dispela traipela man ol i man nogut. Ol i save bagarapim ol man. Ol i laik fosim olgeta man long mekim pasin nogut olsem ol yet i save mekim.

Enok i dai pinis, tasol nau i gat wanpela man i stap long graun em i gutpela man. Nem bilong dispela man em Noa. Oltaim em i save mekim ol samting God i laik em i mas mekim.

Wanpela taim God i tokim Noa olsem Em bai bagarapim olgeta man nogut. Tasol God bai lukautim Noa, famili bilong em, na planti animal. Yumi ken stori long olsem wanem God i bin mekim dispela samting.

Stat 6:1-8; Jut 6.



Ol askim

  • Wanem samting i kamap taim sampela ensel bilong God i bihainim Satan?
  • Bilong wanem sampela ensel i lusim wok bilong ol long heven na kam daun long graun?
  • Bilong wanem i no stret long ol ensel i kam daun long graun na kisim bodi olsem bilong ol man?
  • Wanem samting i narapela kain long ol pikinini bilong ol ensel?
  • Olsem yu lukim long piksa, ol pikinini bilong ol ensel i mekim wanem taim ol i kamap ol traipela man?
  • Taim Enok i dai pinis, husat dispela gutpela man i stap long graun? Bilong wanem God i laikim em?

Sampela askim moa

  • Ritim Stat 6:1-8.

    Stat 6:6 i kamapim wanem tok i soim olsem pasin bilong yumi inap mekim sampela samting long Jehova? (Sng. 78:40, 41; Snd. 27:11)

  • Ritim Jut 6.

    Ol ensel long taim bilong Noa em ol “i no laik i stap gut long dispela wok God i bin givim ol,” olsem wanem pasin bilong ol i olsem wanpela tok lukaut long yumi long nau? (1 Ko. 3:5-9; 2 Pi. 2:4, 9, 10)