Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 6: Gutpela Pikinini na Pikinini Nogut

Stori 6: Gutpela Pikinini na Pikinini Nogut

LUKIM Kein na Abel. Tupela wantaim i bikpela pinis. Kein i kamap man bilong wokim gaden. Em i save planim ol wit na diwai prut na kumu samting.

Kein na Abel i givim ofa long God

Abel i kamap man bilong lukautim sipsip. Em i save amamas long lukautim ol pikinini sipsip. Ol dispela sipsip i kamap bikpela, na i no longtaim na Abel i gat wanpela lain sipsip.

Wanpela taim Kein na Abel i bringim ofa i go long God. Kein i bringim sampela kaikai em i bin kamapim long gaden. Na Abel i bringim nambawan gutpela sipsip long lain sipsip bilong em. Jehova i amamas long Abel na ofa bilong em. Tasol em i no amamas long Kein na ofa bilong em. Yu save bilong wanem em i no amamas?

Tru, ofa bilong Abel i winim ofa bilong Kein, tasol God i no tingim dispela samting tasol, nogat. Abel em i gutpela man. Em i laikim Jehova na brata bilong em. Tasol Kein em i man nogut, em i no laikim brata bilong em.

Olsem na God i tokim Kein long em i mas senisim pasin bilong em. Tasol Kein i no harim tok. Em i kros nogut tru, long wanem, God i laikim tumas Abel. Olsem na Kein i tokim Abel: ‘Yumi go raun liklik.’ Tupela i go raun na taim ol yet tasol i stap, Kein i paitim brata bilong em, Abel. Em i paitim Abel strong tru na kilim em i dai. Kein i mekim pasin nogut tru, a?

Kein i kilim i dai Abel na em i ranawe

Maski Abel i dai pinis, God i tingim em yet. Abel i gutpela man, na Jehova i no inap lusim tingting long kain man olsem. Olsem na bihain God Jehova bai kirapim bek Abel. Long dispela taim bai em i no inap i dai gen. Em bai stap oltaim oltaim long graun. Bai yumi amamas long lukim ol kain man olsem Abel, a?

Tasol God i no amamas long ol man i kain olsem Kein. Olsem na taim Kein i kilim pinis brata bilong em, God i givim strafe long em na salim em i go longwe tru long famili bilong em. Taim Kein i go bilong sindaun long narapela hap bilong graun, em i kisim wanpela susa bilong em i go wantaim em, na em i kamap meri bilong Kein.

Bihain Kein na meri bilong em i kamapim ol pikinini. Ol arapela pikinini man na pikinini meri bilong Adam na Iv ol i marit, na ol tu i kamapim ol pikinini. I no longtaim na planti manmeri i pulap long graun. Yumi ken stori long sampela bilong ol.

Stat 4:2-26; 1 Jon 3:11, 12; Jon 11:25.



Ol askim

  • Kein na Abel i mekim wanem ol wok?
  • Kein na Abel i bringim wanem ol ofa long Jehova?
  • Bilong wanem Jehova i amamas long ofa bilong Abel? Bilong wanem em i no amamas long ofa bilong Kein?
  • Kein em i wanem kain man? Jehova i mekim wanem bilong stretim em?
  • Kein i mekim wanem taim em wanpela tasol i stap wantaim brata bilong em?
  • Stori long samting i kamap long Kein taim em i kilim i dai pinis brata bilong em.

Sampela askim moa

  • Ritim Stat 4:2-26.

    Jehova i givim wanem tok lukaut long Kein? (Stt. 4:7)

    Olsem wanem Kein i kamapim klia tingting i stap long bel bilong em? (Stt. 4:9)

    Wanem tingting bilong Jehova long pasin bilong kilim i dai man? (Stt. 4:10; Ais. 26:21)

  • Ritim 1 Jon 3:11, 12.

    Bilong wanem Kein i kros nogut tru? Olsem wanem dispela i stap olsem tok lukaut long yumi long nau? (Stt. 4:4, 5; Snd. 14:30; 27:4)

    Olsem wanem Baibel i soim olsem maski olgeta long famili bilong yumi ol i birua long Jehova, yumi inap stap gut yet long Em? (Sng. 27:10; Mt. 10:21, 22)

  • Ritim Jon 11:25.

    Jehova i givim wanem tok promis long ol man i bihainim stretpela pasin na long dispela as ol birua i kilim ol i dai? (Jo. 5:24)