Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 4: Bilong Wanem God i Rausim Tupela?

Stori 4: Bilong Wanem God i Rausim Tupela?

LUKIM samting i kamap nau. God i rausim Adam na Iv long naispela gaden Iden. Yu save bilong wanem em i mekim olsem?

God i rausim Adam na Iv long gaden Iden

Long wanem, tupela i mekim pasin nogut tru. Olsem na Jehova i givim strafe long ol. Yu save wanem pasin nogut ol i bin mekim?

Tupela i mekim samting God i bin tambuim ol long mekim. God i tokim tupela olsem ol i ken kisim kaikai long ol diwai i stap long gaden. Tasol long wanpela diwai God i tok ol i no ken kaikai, sapos ol i kaikai, bai ol i dai. Dispela diwai em bilong God yet. Na yumi save olsem i no stret long kisim samting bilong narapela man, a? Orait, wanem samting i kamap?

Wanpela taim Iv tasol i stap long gaden, na wanpela snek i toktok long em. Tingim! Snek i tokim Iv long kaikai prut bilong diwai God i bin tambuim ol long en. Taim Jehova i wokim ol snek, em i no wokim ol na ol inap toktok. Olsem na yumi save, wanpela man i tromoi tok long maus bilong snek na i olsem snek yet i toktok. Dispela man em husat?

Em i no Adam. Em wanpela bilong ol man Jehova i wokim paslain tru long em i wokim graun. Ol dispela man i ensel, na yumi no inap lukim ol. Wanpela bilong ol dispela ensel i kisim pasin antap. Em i kirap kisim tingting olsem em i mas kamap olsem God. Na em i laik bai ol man i mas bihainim tok bilong em na ol i no ken bihainim tok bilong Jehova. Dispela ensel i mekim na i olsem snek i toktok.

Ensel hia i giamanim Iv. Taim ensel i tokim Iv long em bai kamap olsem God sapos em i kaikai dispela prut, Iv i bilipim tok bilong em. Olsem na em i kaikai dispela prut, na Adam tu i kaikai. Tupela i sakim tok bilong God, olsem na God i rausim ol long dispela naispela gaden.

Tasol bihain God bai mekim dispela graun olgeta i kamap naispela ples tru olsem gaden Iden. Bihain bai yumi kisim save long olsem wanem yu tu inap insait long wok bilong mekim graun i kamap kain ples olsem. Tasol nau yumi ken stori long samting i painim Adam na Iv.

Stat 2:16, 17; 3:1-13, 24; KTH 12:9.



Ol askim

  • Long dispela piksa, wanem samting i kamap long Adam na Iv?
  • Bilong wanem Jehova i givim strafe long ol?
  • Wanpela snek i bin tok wanem long Iv?
  • Husat i mekim na snek i toktok long Iv?
  • Bilong wanem Adam na Iv i lusim ples Paradais bilong tupela?

Sampela askim moa

  • Ritim Stat 2:16, 17 na 3:1-13, 24.

    Olsem wanem dispela askim snek i givim long Iv i bagarapim gutnem bilong Jehova? (Stt. 3:1-5; 1 Jo. 5:3)

    Ol samting Iv i bin mekim i givim wanem tok lukaut long yumi? (Fl. 4:8; Jem. 1:14, 15; 1 Jo. 2:16)

    Olsem wanem Adam na Iv i no tokaut olsem ol i gat asua? (Stt. 3:12, 13)

    Olsem wanem ol ensel i sanap long hap sankamap bilong gaden Iden ol i sambai long wok bos bilong Jehova? (Stt. 3:24)

  • Ritim Kamapim Tok Hait 12:9.

    Satan i bin pulim ol man long sakim wok bos bilong God i go inap long wanem mak? (1 Jo. 5:19)