Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 10: Bikpela Tait

Stori 10: Bikpela Tait

OL MAN i stap ausait long sip, ol i stap olsem tasol na mekim yet wankain pasin bilong ol. Ol i no ting olsem Bikpela Tait bai kam. Ating ol i lap moa yet. Tasol i no longtaim na ol i no lap moa.

Tait wara i raunim olgeta hap na ol manmeri na ol animal i pret

Wantu tasol ren i pundaun. Dispela ren i olsem ol i kapsaitim wara long baket. Noa i bin tok tru! Tasol nau i leit pinis long wanpela man i ken go insait long sip. Jehova yet i bin pasim strong dua.

I no longtaim na wara i karamapim olgeta hap bilong graun na i wok long i go antap. Wara i tait na i daunim ol diwai na tantanim ol bikpela ston i go, na i mekim bikpela pairap. Ol manmeri i pret. Ol i go antap long ol maunten. Ol i tingting olsem i gutpela moa sapos ol i bin harim tok bilong Noa na i go insait long sip taim dua i op yet long ol! Tasol nau i no gat taim moa.

Wara i wok yet long solap i go antap. Inap 40 de na 40 nait ren i pundaun. Wara i go antap long ol sait sait bilong maunten na i no longtaim em i karamapim ol maunten i antap tru. Olsem God i bin tok, olgeta man na animal i no stap insait long sip, ol i dai. Tasol olgeta man i stap insait long sip ol i stap gut.

Noa na tripela pikinini man bilong em, ol i bin wokim gut sip. Wara i apim sip, na sip i drip antap long wara. Bihain ren i pinis na san i lait. Noa na famili bilong em i kirap nogut long samting ol i lukim! Bikpela wara i karamapim olgeta hap. Na wanpela samting tasol ol inap lukim em sip i drip antap long wara.

Sip i trip antap long wara

Ol traipela man i dai pinis. Ol i no stap moa na bai ol i givim pen long ol man. Olgeta bilong ol i dai pinis, na ol mama bilong ol, na olgeta arapela manmeri nogut, olgeta i dai. Tasol olsem wanem long ol papa bilong ol?

Ol papa bilong ol dispela traipela man ol i no man tru olsem yumi. Ol i ensel na ol i bin kam daun long graun na tanim i kamap man. Olsem na taim Bikpela Tait i kamap, ol i no dai wantaim olgeta arapela manmeri, nogat. Ol i tanim i kamap ensel gen na ol i go bek long heven. Tasol God i no larim ol i go bek insait long lain ensel bilong em. Olsem na ol i kamap lain ensel bilong Satan. Baibel i kolim ol olsem ol spirit nogut.

God i kirapim win na nau tait i slek na wara i wok long i go daun. Faipela mun bihain sip i sindaun antap long wanpela maunten. Planti de moa i lus, na ol lain insait long sip inap lukluk i go ausait na lukim het bilong ol maunten. Wara i wok yet long i go drai.

Bihain Noa i salim wanpela kotkot i lusim sip i go. Kotkot i save flai i go, tasol em i save kam bek long sip na malolo, long wanem, em i no painim wanpela gutpela hap bilong sindaun. Em i mekim olsem inap sampela taim.

Wanpela pisin balus

Noa i laik save olsem wara i drai pinis o nogat, olsem na bihain em i salim wanpela balus i go. Tasol balus tu i kam bek, long wanem, em i no painim ples bilong sindaun. Noa i salim balus i go raun long namba tu taim, na nau balus i karim wanpela lip bilong diwai oliv i kam. Olsem na Noa i save wara i go daun pinis. Bihain Noa i salim balus i go long namba tri taim na balus i no kam bek moa. Em i painim pinis ples drai bilong sindaun.

Nau God i tokim Noa: ‘Yu lusim sip na yu go daun wantaim olgeta famili bilong yu na olgeta animal.’ Ol i bin stap insait long sip winim wanpela yia olgeta. Olsem na yumi ken tingim bikpela amamas bilong ol long ol i no bagarap na ol inap i go ausait gen long sip, a?

Stat 7:10-24; 8:1-17; 1 Pita 3:19, 20.



Ol askim

  • Bilong wanem i no gat wanpela man inap i go insait long sip taim ren i kirap pinis?
  • Jehova i mekim ren i pundaun inap hamas de na nait? Wara i solap i go antap inap long wanem mak?
  • Wanem samting i kamap long sip taim wara i karamapim graun?
  • Ol traipela man i abrusim bagarap long Bikpela Tait o nogat? Olsem wanem long ol papa bilong ol?
  • Bihain long 5-pela mun wanem samting i kamap long sip?
  • Bilong wanem Noa i salim wanpela kotkot i lusim sip i go?
  • Olsem wanem Noa i save olsem wara i go daun pinis?
  • Noa na famili bilong em ol i stap insait long sip winim wanpela yia olgeta, na nau God i tok wanem long em?

Sampela askim moa

  • Ritim Stat 7:10-24.

    Olgeta samting long graun i bagarap olgeta o olsem wanem? (Stt. 7:23)

    Inap hamas de i lus na wara bilong Bikpela Tait i go daun? (Stt. 7:24)

  • Ritim Stat 8:1-17.

    Olsem wanem Stat 8:17 i soim olsem samting Jehova i tingting pinis long kamapim long graun long pastaim tru, dispela tingting i no senis? (Stt. 1:22)

  • Ritim 1 Pita 3:19, 20.

    Taim ol ensel em ol i bikhet long God ol i go bek long heven, ol i kisim wanem strafe? (Ju. 6)

    Olsem wanem stori bilong Noa na famili bilong em i strongim bilip bilong yumi olsem Jehova inap helpim lain bilong em long abrusim bagarap? (2 Pi. 2:9)