Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Stori Buk Bilong Mi

Stori 1: God i Kirap Wokim Ol Samting

Stori 1: God i Kirap Wokim Ol Samting

OLGETA gutpela samting bilong yumi i kam long God. Em i wokim san, mun, na ol sta bilong givim lait long yumi. Na God i wokim graun bilong yumi ken i stap long en.

Tasol san, mun, ol sta, na graun i no namba wan samting God i bin wokim. Yu save em i bin wokim wanem samting pastaim? Em i wokim ol man olsem em yet. Yumi no inap lukim ol dispela man, olsem yumi no inap lukim God. Baibel i kolim ol dispela man olsem ensel. God i wokim ol ensel bilong i stap wantaim em long heven.

Namba wan ensel God i wokim em i narapela kain. Em i namba wan Pikinini bilong God, na em i wok wantaim Papa bilong em. Em i helpim God long wokim olgeta arapela samting. Em i helpim God long wokim san, mun, ol sta, na graun bilong yumi.

Pastaim tru graun i bin stap olsem wanem? Long dispela taim, i no gat man inap i stap long graun. Bikpela solwara i karamapim olgeta hap bilong graun. Tasol God i laik bai ol man i stap long graun, olsem na em i kirap long redim ol samting. Em i mekim wanem?

Orait, pastaim graun i mas i gat lait. Olsem na God i mekim na lait bilong san i kisim graun. Em i mekim na bai i gat taim bilong tulait na taim bilong tudak, olsem san na nait. Solwara i karamapim graun, olsem na bihain God i mekim na graun i kam antap na i stap ples klia.

Pastaim i no gat wanpela samting i stap long graun. Em i olsem samting yu lukim long dispela piksa. I no gat ol plaua o diwai o animal. Na i no gat pis tu long solwara. God i mas mekim bikpela wok moa yet bilong redim graun na bai ol man na ol animal i ken i stap long en.

Jeremaia 10:12; Kolosi 1:15-17; Stat 1:1-10.

Graun i stap nating


Ol askim

  • Olgeta gutpela samting i kamap olsem wanem? Yu inap kolim wanpela bilong ol dispela gutpela samting?
  • God i bin wokim wanem samting pastaim?
  • Bilong wanem namba wan ensel em i narapela kain?
  • Long pastaim tru graun i stap olsem wanem? Stori long dispela. (Lukim piksa.)
  • God i mekim wanem bilong redim graun na bai ol animal na ol man i ken stap long en?

Sampela askim moa

  • Ritim Jeremaia 10:12.

    Ol samting God i wokim i kamapim wanem ol pasin bilong em? (Ais. 40:26; Ro. 11:33)

  • Ritim Kolosi 1:15-17.

    Olsem wanem Jisas i insait long wok bilong kamapim ol samting? Dispela i mas mekim wanem long tingting yumi holim long em? (Kl. 1:15-17)

  • Ritim Stat 1:1-10.

    Husat i wokim graun? (Stt. 1:1)

    Wanem samting i kamap long de namba wan? (Stt. 1:3-5)

    Stori long ol samting i kamap long de namba 2. (Stt. 1:6-8)