Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Laip na Wok Autim Tok Miting Wok Buk  |  Jun 2017

 BIHAINIM PASIN KRISTEN

Bihainim Ol Stretpela Lo Bilong Jehova

Bihainim Ol Stretpela Lo Bilong Jehova

God Jehova i putim ol stretpela lo bilong stiaim ol man. Em i wokim marit bambai man na meri i ken pas gut inap oltaim. (Mt 19:4-6, 9) Em i tambuim olgeta kain pasin pamuk. (1Ko 6:9, 10) Em i givim ol stiatok long sait bilong klos na bilas, dispela i mekim na yumi stap narakain long ol manmeri bilong dispela graun.—Lo 22:5; 1Ti 2:9, 10.

Long nau, planti man i givim baksait long ol stretpela lo bilong Jehova. (Ro 1:18-32) Ol i larim tingting bilong ol man long stiaim ol long sait bilong klos na bilas na pasin ol i mekim. Planti man i bihainim ol pasin nogut na ol i save tok bilas long ol lain i bihainim stretpela pasin.—1Pi 4:3, 4.

Yumi ol Witnes Bilong Jehova, olsem na yumi mas bihainim ol lo bilong God. (Ro 12:9) Olsem wanem yumi inap mekim olsem? Yumi mas mekim ol samting em God i orait long en. Na tu, yumi mas wok strong long bihainim ol stretpela lo bilong God long laip bilong yumi. Olsem, taim yumi makim ol klos na bilas yumi laik werim yumi ken askim yumi yet: ‘Klos na bilas bilong mi i kamapim klia olsem mi bihainim tingting bilong Jehova o mi bihainim tingting bilong dispela graun? Ol klos na bilas bilong mi i soim olsem mi save pret long God?’ O taim yumi makim wanpela program o muvi yumi laik lukim, yumi ken askim yumi yet olsem: ‘Jehova bai orait long dispela samting mi lukim? Dispela program o muvi i kamapim tingting bilong husat? Pasin bilong lukim ol kain piksa olsem inap mekim na mi no strong moa long sakim ol pasin nogut? (Sg 101:3) Olsem wanem? Dispela inap pundaunim famili bilong mi na ol narapela?’ —1Ko 10:31-33.

Bilong wanem em i bikpela samting long yumi mas bihainim ol lo bilong Jehova? Klostu nau, Krais Jisas bai bagarapim olgeta manmeri nogut bilong dispela graun na ol pasin nogut. (Ese 9:4-7) Ol manmeri husat i bihainim laik bilong God ol tasol bai abrusim bagarap. (1Jo 2:15-17) Olsem na yumi mas sambai long bihainim ol stretpela lo bilong Jehova, long dispela rot ol man inap lukim gutpela pasin bilong yumi na ol inap givim glori long God.—1Pi 2:11, 12.

Pasin bilong mi long werim klos na bilas i soim olsem mi gat wanem tingting long ol stretpela lo bilong God?

LUKIM VIDIO KAMAP PREN BILONG JEHOVA—WANPELA MAN, WANPELA MERI, NA BIHAIN BEKIM OL DISPELA ASKIM:

  • Bilong wanem yumi mas bihainim ol lo bilong Jehova?

  • Bilong wanem ol papamama i mas skulim ol pikinini long ol lo bilong Jehova taim ol i liklik yet?

  • Olsem wanem ol lapun na ol yangpela inap helpim ol manmeri long kisim save long ol gutpela pasin bilong God?