Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Laip na Wok Autim Tok Miting Wok Buk  |  Jun 2017

 BIHAINIM PASIN KRISTEN

Amamas Long Autim Gutnius

Amamas Long Autim Gutnius

Olsem wanem? Sampela taim yu hatwok long autim tok? Planti bilong yumi bai tok yes long dispela askim. Bilong wanem? Ating planti taim yumi save bungim ol man i les long harim tok o mekim pasin birua long yumi, o yumi pret long toktok long ol man em yumi no save long ol. Ol dispela samting inap pinisim amamas bilong yumi. Maski i olsem, yumi lotuim God bilong amamas, olsem na em i laik bai yumi amamas na mekim wok bilong em. (Sg 100:2; 1Ti 1:11) Wanem 3-pela risen na yumi amamas long autim tok?

Namba 1, yumi save tokim ol man long gutpela samting bai kamap bihain. Maski ol man i no bilip moa olsem i gat gutpela samting bai kamap bihain, yumi inap helpim ol long save long “gutpela tok bilong samting i gutpela moa.” (Ai 52:7, NW ) Tasol gutnius bilong Kingdom Bilong God i ken mekim yumi amamas. Paslain long yumi go autim tok, yumi ken tingim tingim long bel ol blesing em Kingdom Bilong God bai kamapim long graun.

Namba 2, gutnius yumi autim i helpim ol man long sait bilong skin na long sait bilong bilip. Ol i wok strong long lusim ol pasin nogut na ol inap kisim laip oltaim. (Ai 48:17, 18; Ro 1:16) Tingim olsem yumi insait long wok bilong painim na helpim ol man long abrusim bagarap. Maski sampela manmeri i no laik bai yumi helpim ol, yumi wok yet long painim ol manmeri husat i laik kisim helpim.—Mt 10:11-14.

Namba 3 bikpela samting, em wok autim tok bilong yumi i litimapim nem bilong Jehova. Em i tingim tru wok autim tok yumi mekim. (Ai 43:10; Hi 6:10) Na tu, em i givim holi spirit long yumi bambai yumi ken mekim gut dispela wok. Olsem na yumi mas beten askim Jehova long givim yumi pasin bilong amamas, em pasin bilong holi spirit. (Ga 5:22) Taim yumi mekim olsem, yumi inap daunim pasin bilong pret na tingting planti, na yumi inap strongim bel na autim tok. (Ap 4:31) Maski ol manmeri long teritori i mekim wanem kain pasin long yumi, yumi bai amamas yet long mekim wok autim tok.—Ese 3:3.

Yu laik bihainim wanem pasin taim yu autim tok? Yu ken mekim wanem bilong soim olsem yu amamas?

LUKIM VIDIO REGAIN JOY THROUGH STUDY AND MEDITATION, NA BEKIM OL DISPELA ASKIM:

  • Bilong wanem em i bikpela samting long yumi mas stadi long olgeta taim, maski yumi lusim planti aua long autim tok long olgeta mun?

  • Olsem wanem yumi inap bihainim pasin bilong Mary?

  • Yu save lusim haptaim bilong tingim tingim ol tok bilong God long Baibel?

  • Wanem samting i save mekim yu amamas taim yu autim tok?