Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Long Intenet | NEW WORLD TRANSLATION OF THE HOLY SCRIPTURES (1984 EDITION)

Revelesen 13:1-18

13  Na traipela snek i sanap i stap long wesan bilong solwara. Na mi lukim wanpela wel animal i lusim solwara na i kam antap. Em i gat 10-pela kom na 7-pela het, na antap long ol kom bilong en, i gat 10-pela kraun, tasol long ol het bilong en i gat ol nem i tok bilas long God.  Dispela wel animal mi lukim i olsem wanpela lepat, tasol lek bilong en i olsem bilong wanpela bea, na maus bilong en i olsem maus bilong wanpela laion. Na traipela snek i givim strong, na sia king, na bikpela namba long dispela wel animal.   Na mi lukim wanpela het bilong em i gat bikpela bagarap long en, na em inap dai long en tasol em i kamap orait. Na olgeta manmeri bilong graun i amamas tru long dispela wel animal na ol i bihainim em.  Na ol i lotuim dispela traipela snek, long wanem, em i givim namba long wel animal. Na ol i mekim ol dispela tok bilong lotuim dispela wel animal: “Husat i olsem dispela wel animal? Na husat inap pait wantaim em?”  Na traipela snek i givim maus long wel animal, na maus i bikmaus na mekim tok nogut. Na wel animal i kisim namba bilong mekim wok inap 42 mun.  Na em i opim maus bilong en na tok bilas long God, na tok bilas long nem bilong God na long ples bilong en, em heven, na long ol lain i stap long heven.  Na em i kisim tok orait long pait long ol manmeri holi bilong God na daunim ol. Na em i kisim namba long bosim olgeta lain na olgeta lain pipol na olgeta tokples na olgeta kantri.  Na olgeta manmeri long graun bai lotuim em. Kirap long taim ol manmeri i bin bon long graun na i kam, nem bilong ol manmeri husat i lotuim dispela wel animal i no i stap long skrol bilong Pikinini Sipsip, em ol man i bin kilim em i dai.   Man i gat yau, em i mas harim tok. 10  Sapos wanpela man i mas i go kalabus, orait em bai i go kalabus. Sapos wanpela man bai kilim i dai narapela man long bainat, orait ol i mas kilim em i dai long bainat. Dispela i makim olsem ol manmeri holi i mas sanap strong na holimpas bilip.  11  Na mi lukim narapela wel animal i kamaut long graun na i kam antap. Na em i gat 2-pela kom i olsem bilong pikinini sipsip, tasol em i kirap toktok olsem wanpela traipela snek. 12  Na em i stap long ai bilong namba 1 wel animal na em i mekim wok long wankain namba olsem bilong dispela namba 1 wel animal. Na em i mekim graun na olgeta manmeri i stap long graun ol i lotuim dispela namba 1 wel animal. Em dispela wel animal i bin i gat bikpela bagarap na em inap dai long en, tasol em i kamap orait. 13  Na dispela wel animal i gat 2-pela kom i wokim ol bikpela mirakel, na long ai bilong ol manmeri em i mekim tu paia i lusim skai na i kam daun long graun.  14  Na em i giamanim ol manmeri i stap long graun. Em i mekim olsem long rot bilong tok orait em i kisim bilong wokim ol mirakel long ai bilong namba 1 wel animal. Na em i tokim ol manmeri i stap long graun long wokim wanpela piksa bilong dispela namba 1 wel animal, em dispela wel animal i bin i gat bikpela bagarap na em inap dai long en, tasol em i kamap orait. 15  Na wel animal i gat 2-pela kom i kisim tok orait long givim win bilong laip long dispela piksa bilong namba 1 wel animal, na bai piksa bilong dispela wel animal i ken toktok na kisim strong bilong kilim i dai ol man em ol i no laik lotu long piksa bilong dispela wel animal.  16  Wel animal i gat 2-pela kom, em i strong tru long olgeta man i mas kisim mak long han sut bilong ol o long poret bilong ol, em ol man nating na man i gat nem, na ol maniman na ol rabisman, na ol friman na ol wokboi. 17  Na sapos man i no gat mak, em dispela nem bilong wel animal o namba bilong nem bilong en, orait em i no inap baim o salim ol samting. 18  Man i mas i gat savetingting bilong save long dispela samting: Man i gat gutpela tingting em i ken skelim namba bilong wel animal. Dispela namba em i namba bilong man. Namba bilong en em 666.

Ol Futnot