Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Long Intenet | NEW WORLD TRANSLATION OF THE HOLY SCRIPTURES (1984 EDITION)

Revelesen 1:1-20

1  Jisas Krais i kamapim wanpela tok hait em God i bin givim long em. God i mekim olsem bai em i ken soim ol wokboi bilong en long ol samting i no longtaim bai kamap. Na em i salim ensel bilong en i kam long wokboi bilong en, Jon, na long rot bilong dispela ensel em i kamapim dispela tok hait long rot bilong ol piksa i makim ol samting.  Na Jon i tokaut long tok God i bin givim na long dispela tokaut bilong Jisas Krais. Yes, Jon i tokaut long olgeta samting em i bin lukim.  Man i ritim ol tok bilong dispela tok profet long ol arapela, em i ken amamas. Na ol man i harim dispela tok na ol man i bihainim ol tok bilong en, ol tu i ken amamas. Long wanem, dispela taim God i makim em i kam klostu pinis.   Mi Jon, mi raitim dispela tok i go long 7-pela kongrigesen* i stap long provins Esia:* Bikpela pasin helpim na bel isi i ken i stap wantaim yupela. Dispela i kam long “Man husat i stap nau, na husat i stap bipo, na husat bai kam,” na i kam long 7-pela spirit i stap long ai bilong sia king bilong en.  Na yupela i ken kisim tu bikpela pasin helpim i kam long Jisas Krais, “em Man bilong holimpas wok bilong autim tok,” na “Em i dispela fesbon husat i namba 1 man long kirap bek long dai,” na “Em i Bosman bilong ol king bilong graun.” Jisas husat i save laikim yumi, na i bin tekewe ol sin bilong yumi long rot bilong blut bilong em yet,  na i mekim yumi i kamap ol king na ol pris bilong God, em God na Papa bilong em, yes, dispela Jisas i ken kisim glori na strong inap oltaim oltaim. Amen.   Lukim! Em bai kam wantaim ol klaut na olgeta ai bai lukim em, na ol man i bin sutim em ol tu bai lukim em. Na olgeta lain man bilong graun ol bai tingting long em na paitim bros bilong ol yet bilong kamapim bel sori bilong ol. Yes, Amen.   Jehova God i tok: “Mi Alfa na mi Omega.* Mi dispela Man husat i stap nau, na husat i stap bipo, na husat bai kam, mi God i Gat Olgeta Strong.”   Mi Jon, brata bilong yupela, mi kisim pen na hevi wantaim yupela na mi bai insait long kingdom wantaim yupela na mi sanap strong wantaim yupela, na yumi olgeta i stap disaipel bilong Jisas. Mi bin autim tok bilong God na mi bin tokaut long Jisas, na long dispela as mi stap long ailan ol i kolim Patmos. 10  Long rot bilong holi spirit mi lukim olsem mi stap long de bilong Bikpela. Na baksait long mi, mi harim wanpela strongpela nek i singaut olsem krai bilong trampet. 11  Em i tok: “Samting yu lukim, yu mas raitim long skrol na salim i go long 7-pela kongrigesen, long Efesus na long Smerna na long Pergamum na long Taiataira na long Sardis na long Filadelfia na long Laodisia.”  12  Na mi tanim bilong lukim husat i toktok long mi, na taim mi tanim, mi lukim 7-pela lam gol. 13  Na namel long ol lam mi lukim wanpela man i stap em i olsem pikinini bilong man. Em i werim longpela klos i karamapim lek bilong en, na em i pasim let gol long bros bilong en. 14  Na tu, gras long het bilong en i waitpela stret. Na ai bilong en i lait olsem paia i lait strong tru. 15  Na tupela lek bilong en i lait olsem gutpela kopa i lait strong insait long bikpela paia. Na krai bilong nek bilong en i olsem krai bilong bikpela wara i ron strong. 16  Na em i holim 7-pela sta long han sut bilong en. Na wanpela longpela bainat i gat tupela sap na i sap tru i kam ausait long maus bilong en. Na pes bilong en i lait olsem san i lait strong tru. 17  Na taim mi lukim em, mi pundaun klostu long lek bilong en na mi stap olsem man i dai pinis. Na em i putim han sut bilong en antap long mi na i tok: “Yu no ken pret. Mi Fes na mi Las, 18  na mi dispela man i stap laip. Na mi bin dai pinis, tasol harim! Mi stap laip oltaim oltaim, na mi holim ol ki bilong dai na bilong Matmat.* 19  Olsem na yu mas raitim tok bilong ol samting yu bin lukim, na ol samting i wok long kamap nau na ol samting bai kamap bihain long ol dispela samting. 20  Yu bin lukim 7-pela sta i stap long han sut bilong mi na 7-pela lam gol. Tok hait holi bilong dispela i olsem: Dispela 7-pela sta i makim ol ensel bilong 7-pela kongrigesen, na dispela 7-pela lam i makim 7-pela kongrigesen.

Ol Futnot

 Lukim futnot long Mt 16:⁠18.
 Lukim futnot long Ap 2:⁠9.
 Long alfabet bilong ol Grik, Alfa em fes leta na Omega em laspela leta.
 Grik i tok, “Hades.” Lukim Apd 8.