Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Long Intenet | NEW WORLD TRANSLATION OF THE HOLY SCRIPTURES (1984 EDITION)

Matyu 3:1-17

3  Long dispela taim Jon Bilong Baptais i kam na autim tok long Judia long ples nating.  Em i tok: “Yupela tanim bel. Kingdom bilong heven i kam klostu pinis.”  Jon em i dispela man profet Aisaia i bin tokaut long en, olsem: “Harim! Wanpela man i stap long ples nating na i wok long singaut olsem: ‘Yupela i mas redim rot bilong Jehova! Mekim ol rot bilong en i kamap stret.’ ”  Dispela Jon i pasim klos ol i wokim long gras bilong kamel na em i pasim let long bel bilong em. Na kaikai bilong en, em ol grasopa na hani bilong bus.  Ol manmeri bilong Jerusalem na long olgeta hap bilong Judia, na long ol ples i stap klostu long wara Jordan, ol i go long em.  Na em i baptaisim ol manmeri long wara Jordan. Na ol i autim ol sin bilong ol.   Taim em i lukim planti bilong ol Farisi na Sadyusi i kam long ples bilong kisim baptais, em i tokim ol: “Yupela ol pikinini bilong ol posin snek, husat i tokim yupela long ranawe long belhat bilong God i laik kamap?  Orait, kamapim ol kaikai i stret wantaim pasin bilong tanim bel.  Yupela i no ken ting yupela inap tok, ‘Abraham em i papa bilong mipela.’ Nogat. Mi tokim yupela olsem God inap mekim ol dispela ston i kamap ol pikinini bilong Abraham. 10  Tamiok i stap pinis long as bilong diwai. Olgeta diwai i no karim gutpela kaikai ol bai katim na tromoi long paia. 11  Mi baptaisim yupela long wara, long wanem, yupela i tanim bel. Tasol Man i kam bihain long mi, strong bilong en i winim strong bilong mi, na mi no gutpela inap long rausim sendol bilong en. Dispela Man bai baptaisim yupela long holi spirit na long paia. 12  Long han bilong en, em i holim savol bilong rausim pipia long wit, na em bai klinim gut plua bilong em we ol i krungutim wit. Na em bai bungim ol wit bilong en na putim long bakstua. Tasol em bai kukim ol pipia bilong wit long paia i no save dai.” 13  Orait Jisas i lusim Galili na i go long wara Jordan. Em i go long Jon na i laik kisim baptais long em. 14  Tasol Jon i laik pasim em, na i tok: “Olsem wanem yu kam long mi? Mobeta yu baptaisim mi.” 15  Jisas i bekim tok long em olsem: “No ken pasim mi, i gutpela long yumi inapim olgeta samting i stretpela long dispela rot.” Orait Jon i no pasim em moa. 16  Jisas i baptais pinis na kwiktaim em i kam antap, na skai* i op na em i lukim spirit bilong God i kam daun long em olsem wanpela pisin balus. 17  Na tu, wanpela nek long skai i tok: “Dispela em i Pikinini bilong mi, mi laikim em tumas na mi amamas long em.”

Ol Futnot

 Tok Grik ol i yusim long hia inap makim skai o heven.