Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Long Intenet | NEW WORLD TRANSLATION OF THE HOLY SCRIPTURES (1984 EDITION)

Kolosi 4:1-18

4  Yupela ol bosman, mekim stretpela pasin na pasin i fea long ol wokboi bilong yupela. Yupela i save, yupela tu i gat Bosman i stap long heven.   Oltaim holim strong pasin bilong beten. Yupela i mas was i stap na no ken lusim dispela pasin, na mekim tok tenkyu long God.  Na yupela i mas beten long God i ken helpim mipela tu, olsem em i ken opim rot long mipela long autim tok na tokaut long tok hait holi i stori long Krais. Em long dispela as na mi stap kalabus.  Olsem bai mi ken autim klia dispela tok olsem mi mas mekim.   Bihainim yet savetingting long ol samting yupela i mekim long ol man i stap ausait.* Yupela i mas yusim gut taim bilong yupela.*  Oltaim tok bilong yupela i mas gutpela, olsem yupela i putim sol long en, na bai yupela inap save long wanem tok i stret long bekim long olgeta man wan wan.   Tikikus, em brata mi laikim tumas na gutpela wokman na wanpela wokboi bilong Bikpela wankain olsem mipela, em bai tokim yupela long olgeta samting i kamap long mi.  Mi salim em long yupela bai yupela i ken save long mipela i stap olsem wanem na long em i ken mekim isi bel bilong yupela.  Mi salim Onesimus tu i kam wantaim em. Onesimus em i gutpela brata mi laikim tumas. Bipo em i bin stap wantaim yupela. Tupela bai tokim yupela long olgeta samting i kamap long hia.  10  Aristarkus, em i kalabus wantaim mi, em i salim gude bilong en long yupela, na Mak tu i mekim olsem. Mak em kasen bilong Barnabas, (Mak i dispela man yupela i bin kisim tok long welkamim em sapos em i kam lukim yupela,) 11  na Jisas em ol i kolim Jastus, em tu i salim gude long yupela. Ol dispela man ol i bilong lain i katim skin. Na ol tasol ol i wanwok bilong mi long mekim wok bilong kingdom bilong God. Ol i stap olsem helpim bilong mi na ol i strongim mi. 12  Epafras, wanpela wokboi bilong Krais Jisas na bipo em i bin stap wantaim yupela, em i salim gude bilong en long yupela. Oltaim em i save strong tru long beten askim God long helpim yupela, bai yupela i ken kamap strong olgeta na bilip tru long olgeta laik bilong God. 13  Mi ken tokaut long yupela olsem em i wok strong tru long helpim yupela na ol lain i stap long Laodisia na ol lain long Hierapolis.  14  Luk, dispela dokta yumi laikim tumas, em i salim gude bilong en long yupela, na Demas tu i mekim olsem. 15  Givim gude bilong mi long ol brata long Laodisia na long susa bilong yumi Nimfa na long kongrigesen i bung long haus bilong en. 16  Na taim yupela i ritim pinis dispela pas, stretim rot na ol bai ritim dispela pas tu long kongrigesen bilong Laodisia. Na pas mi salim i go long Laodisia, yupela tu i mas ritim. 17  Na tu, tokim Arkipus: “Lukautim gut dispela wok yu bin kisim long Bikpela, na bai yu ken inapim tru.”  18  Mi Pol, mi raitim dispela gude long han bilong mi yet. Tingim yet olsem mi stap long kalabus. Na bikpela pasin helpim bilong God i ken i stap wantaim yupela.

Ol Futnot

 O, “ol man i no insait long lain brata Kristen.”
 Grik i tok, “yupela i mas baim taim.”