Skip to content

Skip to table of contents

Ol Witnes Bilong Jehova

Makim tokples Tok Pisin

Jems 5:1-20

5  Yupela ol maniman, harim! Yupela i mas krai na singaut nogut long ol hevi i laik kamap long yupela.  Olgeta kago bilong yupela i sting pinis, na ol binatang i kaikai ol klos bilong yupela.  Ol gol na silva bilong yupela i ros pinis, na dispela ros i kamapim ples klia asua bilong yupela, na ros bai kaikai skin bilong yupela. Ol samting yupela i bungim long taim bilong las de i olsem paia.*  Harim! Pe yupela i no bin givim long ol wokman husat i kamautim ol kaikai long ol gaden bilong yupela, ol dispela pe i wok long singaut. Na ol man bilong kisim kaikai ol i wok long singaut bilong kisim helpim, na dispela singaut bilong ol i kamap long yau bilong Jehova, bosman bilong ol ami.*  Yupela i bin kisim planti gutpela samting long dispela graun, na yupela i save bihainim tru pasin bilong inapim laik bilong bodi. Yupela i save kaikai planti na i kamap patpela i go inap long de bilong kilim yupela i dai i kamap pinis.  Yupela i bin kotim na kilim i dai stretpela man. Em i sakim yupela.  Olsem na ol brata, yupela i mas wet na no ken les kwik i go inap long taim Bikpela i kam i stap. Harim! Fama i wok long wetim ol gutpela kaikai i kamap long graun, na em i no save les kwik. Em i wetim taim bilong namba 1 ren na taim bilong laspela ren i kam.*  Yupela tu i mas wet na no ken les kwik. Yupela i mas strongim bel bilong yupela, long wanem, taim bilong Bikpela long i kam i stap, dispela taim i klostu.  Ol brata, yupela i no ken kros long ol arapela long bel bilong yupela, nogut yupela i gat kot. Harim! Jas i sanap pinis long dua. 10  Ol brata, bihainim gutpela piksa bilong ol profet long pasin bilong karim pen na hevi na pasin bilong i no les kwik, em ol profet i bin autim tok long nem bilong Jehova. 11  Harim! Mipela i tokaut olsem, ol man husat i sanap strong na karim hevi ol i amamas. Yupela harim pinis stori bilong Jop long em i bin sanap strong na long ol samting Jehova i bin mekim long em. Yupela i save, Jehova i gat pasin bilong sori tru na marimari. 12  Moa yet, ol brata bilong mi, yupela i mas lusim pasin bilong tok tru antap. No ken kolim heven o graun o kolim ol arapela tok bilong mekim tok tru antap, nogat. Yes bilong yupela i mas minim Yes tasol, na Nogat bilong yupela i mas minim Nogat tasol. Na bai God i no ken kotim yupela. 13  Olsem wanem? I gat wanpela namel long yupela husat i karim pen na hevi? Orait em i no ken lusim pasin bilong beten. I gat wanpela i amamas i stap? Orait em i ken singim ol song bilong preisim God. 14  Olsem wanem? I gat wanpela namel long yupela i sik? Orait em i mas singautim ol hetman bilong kongrigesen* i kam, na ol i ken beten long em na long nem bilong Jehova ol i ken welim em long oil.* 15  Beten bilong man i bilip bai mekim sikman i kamap orait, na Jehova bai helpim em long kamap strong. Na tu, sapos man i bin mekim sin, orait God bai fogivim em. 16  Olsem na yupela i mas autim sin bilong yupela long ol arapela na beten bilong helpim ol arapela, na bai yupela i ken kamap orait. Taim stretpela man i beten strong, dispela beten i gat bikpela pawa na i mekim gutpela wok. 17  Elaija em i wanpela man wankain olsem yumi. Tasol em i beten strong long ren i no ken i kam, na ren i no bin pundaun inap 3-pela yia na 6-pela mun. 18  Na em i beten gen, na ren i kam daun long skai na kaikai i kamap long graun. 19  Ol brata bilong mi, sapos wanpela namel long yupela i lusim tok i tru na narapela i kirapim em long kam bek, 20  orait yupela i mas save olsem, man i kirapim sinman long lusim rot nogut em i bihainim, dispela man bai kisim bek laip* bilong dispela sinman na sinman i no ken i dai, na tu, em bai karamapim planti sin bilong dispela sinman.

Ol Futnot

Jem 5:3  O, “na ros bai kaikai skin bilong yupela olsem paia. Yupela i bin bungim planti mani kago long taim bilong las de.”
Jem 5:4  Dispela i makim ol ami long heven.
Jem 5:7  Taim bilong namba 1 ren i save kamap namel long mun Oktoba. Na taim bilong laspela ren i save kamap namel long mun Epril.
Jem 5:⁠14  Lukim futnot long Mt 16:⁠18.
Jem 5:⁠14  I luk olsem dispela i stori long pasin bilong yusim Tok Bilong God bilong helpim man.
Jem 5:⁠20  Grik, psy·kheʹ. Lukim Apd 7A.