Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Baibel Long Intenet | NEW WORLD TRANSLATION OF THE HOLY SCRIPTURES (1984 EDITION)

2 Korin 7:1-16

7  Ol pren tru, yumi kisim pinis ol dispela promis, olsem na yumi mas rausim olgeta pasin doti bilong skin na bilong tingting.* Yumi mas pret long God na wok oltaim long kamap holi.   Yupela i mas larim spes long lewa bilong yupela inap long mipela. Mipela i no bin rongim wanpela, na mipela i no bagarapim wanpela, na mipela i no bin giamanim wanpela man bilong helpim mipela yet.  Mi no mekim dispela tok bilong kotim yupela, nogat. Mi bin tok pinis long yupela, maski wanem samting i kamap, yupela i stap long lewa bilong mipela.  Mi no surik liklik long toktok long yupela. Mi amamas tru long yupela. Na bel bilong mi i pulap long bel isi. Amamas i pulap tru long mi maski pen na hevi i kamap long mipela.   Taim mipela i kamap long Masedonia, mipela i no kisim malolo, nogat, kain kain hevi i kamap yet long mipela. Long ausait, ol man i birua long mipela, na insait long bel bilong mipela, pret i stap.  Tasol God husat i save mekim isi bel bilong ol man em bel hevi i daunim ol, em i mekim isi bel bilong mipela long rot bilong salim Taitus i kam i stap wantaim mipela.  Taitus i kam i stap wantaim mipela na i no dispela tasol i mekim isi bel bilong mipela, nogat. Yupela i bin mekim isi bel bilong Taitus na dispela tu i mekim isi bel bilong mipela. Em i bin tokim mipela long bikpela laik bilong yupela long lukim mi, na long bel hevi bilong yupela, na long pasin bilong yupela long tingim mi tru. Olsem na mi amamas moa yet.   Maski sapos pas bilong mi i bin mekim yupela i bel hevi, mi no sori long dispela. Tru, bipo mi bin sori, (Mi luksave olsem dispela pas i bin mekim yupela i bel hevi, tasol em bilong sotpela taim tasol,)  tasol nau mi amamas. Mi no amamas long yupela i bel hevi, nogat. Mi amamas, long wanem, bel hevi bilong yupela i kirapim yupela long tanim bel. Bel hevi bilong yupela i stret wantaim laik bilong God, olsem na mipela i no mekim wanpela samting i bagarapim yupela. 10  Bel hevi i stret wantaim laik bilong God i save kirapim man long tanim bel na God i kisim em bek. Dispela i no samting bilong sori long en. Tasol bel hevi bilong dispela graun i save kamapim dai. 11  Tasol harim! Dispela bel hevi i stret wantaim laik bilong God i kamapim ol gutpela samting. Yupela i bin kirap kwik long stretim dispela hevi, yes yupela i kamapim olsem yupela i no gat asua, na yupela i bin kros long dispela rong i bin kamap, yupela i pret long God, na yupela i laik tru long tanim bel, na yupela i givim bel tru, na yupela i stretim rong! Long olgeta samting, yupela i soim olsem yupela i bihainim pasin i klin long dispela samting. 12  Taim mi raitim dispela pas long yupela, mi no raitim bilong helpim dispela man husat i mekim rong, na mi no raitim bilong helpim man em narapela i bin rongim em, nogat. Mi bin raitim dispela pas bai pasin bilong yupela long givim bel bilong yupela long mipela i ken kamap ples klia long ai bilong God. 13  Olsem na mipela i kisim bel isi long yupela. Mipela i amamas long yupela i mekim isi bel bilong mipela, tasol mipela i amamas moa yet long Taitus i amamas. Yupela i bin givim nupela strong long bel* bilong em, na em i amamas. 14  Sapos mi bin toktok wantaim em na litimapim nem bilong yupela, orait mi no kisim sem long tok bilong mi. Tok mipela i mekim long Taitus bilong litimapim nem bilong yupela, em i tru, olsem tasol olgeta samting em mipela i bin tokim yupela long en, em tu i tru. 15  Pasin bilong Taitus long laikim yupela tumas i kamap bikpela moa. Em i tingim pasin bilong yupela olgeta long bihainim tok, na pasin bilong yupela long rispek tru long em taim em i stap wantaim yupela. 16  Mi amamas, long wanem, long olgeta samting yupela i mekim, mi kisim strong.

Ol Futnot

 Grik, pneuʹma. Lukim Apd 7B.
 Grik, pneuʹma. Lukim Apd 7B.