Skip to content

Skip to secondary menu

Ol Witnes Bilong Jehova

Tok Pisin

Wai na Yupela i No Laik Kisim Blut?

Wai na Yupela i No Laik Kisim Blut?

Ol tingting kranki planti man i gat

Stori nating: Ol Witnes Bilong Jehova i no bilip long marasin na ol medikal tritmen.

Stori tru: Mipela i laik kisim bes marasin na tritmen long mipela yet na famili bilong mipela. Taim mipela i sik, mipela i save go lukim ol dokta husat i gat save long givim medikal helpim na wokim gut operesen, na i no yusim blut. Mipela i amamas long ol nupela save ol dokta i kisim bilong helpim sikman. Bilong helpim ol Witnes, ol i bin kamapim ol tritmen we ol i no yusim blut, na nau ol i save yusim ol dispela tritmen bilong helpim olgeta man. Long planti kantri, ol sikman inap abrusim ol hevi em pasin bilong kisim blut i save kamapim, olsem kisim ol sik i stap long blut, pinisim strong bilong bodi long daunim ol sik, na popaia na givim rong blut.

Stori nating: Ol Witnes Bilong Jehova i ting olsem bilip bai oraitim ol sik bilong man.

Stori tru: Mipela i no save oraitim ol sikman long rot bilong bilip.

Stori nating: Bikpela mani i save lus sapos man i no kisim blut.

Stori tru: Ol tritmen we ol i no yusim blut i no gat bikpela pe tumas. *

Stori nating: Planti Witnes, ol pikinini tu, i dai long olgeta yia bikos ol i no kisim blut.

Stori tru: Dispela tok i no gat as bilong en. Ol dokta i save wokim ol bikpela operesen, olsem heart operesen, baksait bun operesen, na putim kidni o liva samting bilong narapela man, na ol i no yusim blut. * Ol sikman, ol pikinini tu, husat i no bin kisim blut ol i save orait hariap, sampela taim ol i orait hariap moa winim ol sikman i bin kisim blut. * Tasol i no gat wanpela man inap tok stret olsem, sikman bai dai bikos em i no kisim blut, o em bai stap laip bikos em i kisim blut.

Wai na ol Witnes Bilong Jehova i no laik kisim blut?

As bilong dispela em samting bilong lotu, na i no sait bilong marasin samting. Olpela na Nupela Testamen wantaim i tokaut klia olsem yumi no ken kisim blut. (Stat 9:4; Wok Pris 17:10; Lo 12:23; Aposel 15:28, 29) Na tu, long ai bilong God blut i makim laip. (Wok Pris 17:14) So mipela i no kisim blut bikos mipela i laik bihainim tok bilong God, na tu, bilong soim rispek long em olsem Man bilong givim laip.

Tingting i senis

Ol i wokim gut ol bikpela operesen na i no yusim blut

Bipo ol dokta i ting ol tritmen we ol i no yusim blut i narakain olgeta, na i olsem man i laik suasaid, tasol nau dispela tingting i senis. Olsem, long 2004, wanpela atikol long wanpela magasin bilong ol dokta i tok “planti tritmen na wei bilong katim man em ol dokta i bin kamapim bilong helpim ol Witnes Bilong Jehova, bihain dispela bai kamap pasin bilong helpim olgeta sikman.” * Long 2010, wanpela atikol long nius Heart, Lung and Circulation i tok, “ol dokta i mas wokim ‘ol operesen we ol i no yusim blut’ long olgeta sikman, na i no long ol Witnes Bilong Jehova tasol.”

Long nau, planti tausen dokta long olgeta hap i bihainim ol pasin bilong katim man we bikpela blut i no save lus. Ol kain pasin olsem we ol i no yusim blut, i stap tu long ol kantri i no gat planti mani, na planti sikman husat i no Witnes Bilong Jehova ol i laik bai dokta i bihainim ol dispela pasin taim ol i katim ol.

^ par. 8 Lukim Transfusion and Apheresis Science, Volume 33, No. 3, p. 349.

^ par. 10 Lukim The Journal of Thoracic and Cardiovascular Surgery, Volume 134, No. 2, p. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; na Continuing Education in Anaesthesia, Critical Care & Pain, Volume 4, No. 2, p. 39.

^ par. 10 Lukim The Journal of Thoracic and Cardiovascular Surgery, Volume 89, No. 6, p. 918; na Heart, Lung and Circulation, Volume 19, p. 658.

^ par. 14 Continuing Education in Anaesthesia, Critical Care & Pain, Volume 4, No. 2, pes 39.