Skip to content

Skip to secondary menu

Ol Witnes Bilong Jehova

Tok Pisin

Wai na Yupela i No Selebretim Krismas?

Wai na Yupela i No Selebretim Krismas?

Ol tingting kranki planti man i gat

Stori nating: Risen na ol Witnes Bilong Jehova i no selebretim Krismas, em ol i no bilip long Jisas.

Stori tru: Mipela i Kristen. Mipela i bilip olsem God bai kisim bek ol man long rot bilong Jisas Krais tasol.—Aposel 4:12.

Stori nating: Yupela i save tokim ol memba bilong yupela long no ken selebretim Krismas, na dispela i brukim ol famili.

Stori tru: Mipela i save tingim tru ol famili, na mipela i yusim Baibel bilong strongim ol famili.

Stori nating: Yupela i no save kisim amamas bilong Krismas long pasin bilong givim samting long ol narapela, kamapim bel isi long graun, na mekim gutpela pasin long ol man.

Stori tru: Mipela i wok strong long kisim pasin bilong givim ol samting na stap bel isi wantaim ol narapela long olgeta de. (Sindaun 11:25; Rom 12:18) Olsem, pasin bilong mipela long mekim ol bung bilong lotu na autim tok, i stret wantaim tok bilong Jisas, em i tok: “Yupela i kisim fri, olsem na yupela i mas givim fri.” (Matyu 10:8) Na tu, mipela i tokim ol man olsem Kingdom Bilong God bai kamapim bel isi hia long graun.—Matyu 10:7.

Wai na ol Witnes Bilong Jehova i no selebretim Krismas?

  • Jisas i tokim yumi long tingim dai bilong em, i no bon de bilong em.—Luk 22:19, 20.

  • Ol aposel bilong Jisas na ol disaipel bilong bipo i no bin selebretim Krismas. Buk New Catholic Encyclopedia i tok “pasin bilong tingim bon de bilong Jisas i bin kirap long 243 [C.E.],” em olsem winim 100 yia bihain long ol laspela aposel i bin dai.

  • I no gat evidens we i soim olsem Jisas i bon long Disemba 25; Baibel i no kamapim bon de bilong em.

  • Mipela i bilip olsem God i no orait long Krismas, bikos lotu haiden i as bilong ol kastam na pasin ol man i bihainim long Krismas.—2 Korin 6:17.

Wai na yupela i strong long no ken selebretim Krismas?

Planti i save selebretim Krismas maski ol i save olsem lotu giaman i as bilong en na Baibel i no tokim yumi long selebretim Krismas. Gutpela sapos ol kain man olsem i askim ol yet: Bilong wanem i stret ol Kristen i tok nogat long Krismas, maski dispela i mekim na ol man i toktok planti long ol? Wai na ol i holim strongpela tingting olsem?

Baibel i kirapim yumi long skelim ol samting, long bihainim “gutpela tingting.” (Rom 12:1, 2) Em i skulim yumi long tingim tok i tru olsem bikpela samting. (Jon 4:23, 24) Mipela i laik bai ol man i holim gutpela tingting long mipela, tasol mipela i bihainim ol stiatok bilong Baibel maski dispela i mekim na ol man i no laikim mipela.

Maski mipela yet i no laik selebretim Krismas, mipela i rispektim raits bilong olgeta man long wokim disisen bilong ol yet long dispela samting. Mipela i no traim long pasim ol narapela long selebretim Krismas.