Nogat, mipela i no mekim olsem. Na taim mipela i luksave olsem sampela bilip bilong mipela i no stret wantaim Baibel, mipela i senisim bilip bilong mipela.

Paslain tru long mipela i bin wokim Baibel New World Translation of the Holy Scriptures long 1950, mipela i skelim tok i stap long Baibel. Mipela i bin yusim ol arapela Baibel long dispela taim na stretim ol samting mipela i bilip long en. Skelim sampela bilip em Ol Witnes Bilong Jehova i bin bilip long en inap longtaim pinis, na wokim tingting bilong yu yet olsem ol i stret wantaim tok i stap long Baibel o nogat.

  1. Bilip bilong mipela: God i no God Triwan. Nius Zion’s Watch Tower bilong Julai 1882 i tok: “Ol man i ritim ol nius bilong mipela i save mipela i bilip long Jehova na Jisas, na holi spirit. Tasol dispela tok olsem dispela 3-pela i 1-pela God tasol, olsem God Triwan, mipela i no wanbel liklik long en, long wanem, dispela tok i no stap insait long Baibel.

    Baibel i tok: “Bikpela, em wanpela tasol.” (Lo 6:4, Buk Baibel) “Yumi gat wanpela God, em Papa. Em i wokim olgeta samting, na yumi stap olsem manmeri bilong em stret. Na i gat wanpela Bikpela, em Jisas Krais, na long rot bilong em olgeta samting i stap, na long rot bilong em yumi kisim laip.” (1 Korin 8:6, Nupela Taim Baibel) Jisas yet i tok: “Papa i stap namba wan tru na i winim mi.”—Jon 14:28, Buk Baibel.

  2. Bilip bilong mipela: Ol man nogut bai i no kisim pen oltaim oltaim long wanpela helpaia. Het tok bilong nius Zion’s Watch Tower bilong Jun 1882 em “Pe Bilong Sin Em Dai,” dispela tok i kam long Rom 6:23. Nius i tok: “Dispela tok i klia tru. Planti man husat i tok olsem Baibel em Tok Bilong God, ol i save sakim dispela gutpela tok, ol i bilip strong olsem Baibel i skulim ol man olsem pe bilong sin em pen inap oltaim oltaim.”

    Baibel i tok: “Man i mekim sin, dispela man tasol i mas i dai.” (Esekiel 18:4, 20, Buk Baibel) Taim God i panisim ol man i sakim tok bilong em, ol bai i no kisim pen inap oltaim oltaim, nogat, bai ol i “bagarap i stap oltaim oltaim.”2 Tesalonaika 1:9, Buk Baibel.

  3. Bilip bilong mipela: Kingdom Bilong God em wanpela gavman tru, i no samting i stap tasol long bel bilong man. Zion’s Watch Tower bilong Disemba 1881 i stori long Kingdom Bilong God olsem: “Bilong dispela kingdom i ken kirap mekim wok, em mas pinisim olgeta kingdom bilong graun pastaim.”

    Baibel i tok: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”—Daniel 2:44, Buk Baibel.

Ol Witnes Bilong Jehova i yusim New World Translation bilong sapotim bilip bilong ol?

Nogat, mipela i save yusim planti narapela narapela Baibel long wok autim tok bilong mipela. Sapos wanpela i laik insait long program bilong mipela long mekim Baibel stadi i no gat pe, mipela inap givim em wanpela Baibel New World Translation na em i no gat wok long baim. Tasol sapos em i laik stadi long Baibel na yusim narapela Baibel, mipela amamas long mekim dispela samting tu.