Skip to content

Skip to secondary menu

Ol Witnes Bilong Jehova

Tok Pisin

Yupela i Autim Tok Long Ol Haus na Bai God i Seivim Yupela?

Yupela i Autim Tok Long Ol Haus na Bai God i Seivim Yupela?

Nogat, i no olsem. Tru, mipela i save autim tok long ol haus, tasol mipela i no ting dispela wok i mekim na God i mas seivim mipela. (Efesus 2:8) Bilong wanem mipela i no ting olsem?

Tingim dispela tok piksa: Wanpela gutpela man i tok promis long givim presen i gat bikpela pe long olgeta man husat i kamap long wanpela hap long de em i makim. Sapos yu bilip tru long tok promis bilong dispela man, bai yu bihainim tok bilong en, a? Na ating bai yu tokim ol pren na famili bilong yu long dispela samting, na ol tu i ken kisim presen. Tasol tingim, as na yu kisim presen em long wanem man i laik givim presen, i no olsem yu mekim sampela wok samting na nau man i mas givim presen long yu.

Na olsem tasol, ol Witnes Bilong Jehova i bilip long tok promis bilong God, olsem em bai givim laip oltaim long ol man i bihainim tok bilong em. (Rom 6:23) Mipela i wok strong long autim bilip bilong mipela long ol narapela man, mipela i laik bai ol tu i kisim dispela gutpela samting God i bin promis long givim. Tasol mipela i no ting olsem wok autim tok bilong mipela i mekim na God i mas seivim mipela. (Rom 1:17; 3:28) I no gat wanpela man inap mekim ol gutpela wok inap long mak we God i ting em i mas givim kain gutpela blesing long em. Baibel i tok: “[God] i bin kisim bek yumi. I no olsem yumi mekim stretpela pasin na em i mekim olsem, nogat. Em i bin marimari long yumi na kisim bek yumi.”—Taitus 3:5.