Skip to content

Skip to secondary menu

Ol Witnes Bilong Jehova

Tok Pisin

Ol Witnes Bilong Jehova i Protestan?

Ol Witnes Bilong Jehova i Protestan?

Nogat. Ol Witnes Bilong Jehova ol i Kristen, tasol mipela i no tingim mipela yet olsem ol Protestan. Bilong wanem?

Dikseneri i tok lotu Protestan em ol “lotu i sakim Misin Katolik.” Mipela ol Witnes Bilong Jehova i no wanbel wantaim ol tok bilong Misin Katolik, tasol mipela i no tingim mipela yet olsem ol Protestan bikos:

  1. Sampela bilip bilong ol Protestan i no stret wantaim tok bilong Baibel. Olsem, Baibel i tok “i gat wanpela God tasol i stap,” em i no God Triwan. (1 Timoti 2:5; Jon 14:28) Na Baibel i tokaut stret olsem panismen God i givim long ol man nogut em ol bai “bagarap inap oltaim,” ol i no go long helpaia.—Song 37:9; 2 Tesalonaika 1:9.

  2. Mipela i no protes long o traim stretim Misin Katolik o narapela lain lotu. Mipela i autim gutnius bilong Kingdom Bilong God. Mipela laik helpim ol arapela long bilip long dispela gutnius. (Matyu 24:14; 28:19, 20) Mipela i no gat tingting long traim long stretim ol arapela lotu, nogat, mipela laik skulim ol man i gat gutpela bel long tok i tru bilong God na Baibel.—Kolosi 1:9, 10; 2 Timoti 2:24, 25.