Skip to content

Skip to secondary menu

Ol Witnes Bilong Jehova

Tok Pisin

Wai na Ol Witnes Bilong Jehova i No Insait Long Wok Politik?

Wai na Ol Witnes Bilong Jehova i No Insait Long Wok Politik?

Ol Witnes Bilong Jehova i no save insait long wok politik bikos long bilip bilong ol em Baibel i as bilong en. Mipela i no save traim long kirapim wanpela mausman bilong politik o wanpela bikman bilong sapotim o sakim wanpela tingting, na mipela i no save vot long wanpela politikol pati o sanap long ileksen bilong kisim wok insait long gavman, na mipela i no save insait long wanpela samting we i laik senisim gavman. Mipela i bilip olsem Baibel i givim gutpela risen long mekim olsem:

  • Mipela i bihainim eksampel bilong Jisas, em i no laik kisim wanpela wok insait long politik. (Jon 6:15) Em i skulim ol disaipel bilong em olsem ol i “no bilong dispela graun” na em i mekim klia long ol olsem ol i no ken sapotim ol samting bilong politik.—Jon 17:14, 16; 18:36; Mak 12:13-17.

  • Mipela i stap gut long Kingdom Bilong God, em Jisas i bin toktok long en taim em i tok: “Ol bai autim dispela gutnius bilong Kingdom long olgeta hap bilong graun.” (Matyu 24:14) Mipela i makim maus bilong Kingdom Bilong God na mipela i kisim wok bilong tokaut long Kingdom Bilong God i mas i kam, olsem na mipela i no insait long ol samting bilong politik bilong olgeta kantri, na bilong kantri mipela i stap long en.—2 Korin 5:20; Efesus 6:20.

  • Pasin bilong i no insait long ol samting bilong politik i mekim na mipela inap autim gutnius bilong Kingdom Bilong God long ol manmeri i holim kain kain tingting long sait bilong politik. Long rot bilong ol tok na pasin bilong mipela, mipela i soim olsem mipela i wet long Kingdom Bilong God long stretim ol hevi bilong graun.—Song 56:11.

  • Mipela i sakim pasin bilong brukim lain insait long politik, olsem na mipela inap stap wanbel olsem brata brata tru bilong olgeta hap. (Kolosi 3:14; 1 Pita 2:17) Dispela i narapela kain long ol lotu husat i insait long ol samting bilong politik, ol i brukim ol lain bilong ol yet.—1 Korin 1:10.

Rispek long ol gavman. Maski mipela i no insait long ol samting bilong politik, mipela i rispektim namba bilong ol gavman em mipela i stap aninit long ol. Dispela i stret wantaim tok Baibel i mekim: “Olgeta man i mas aninit long ol gavman.” (Rom 13:1) Mipela i bihainim lo, baim takis, na wok gut wantaim ol samting gavman i mekim bilong lukautim ol sitisen bilong en. Mipela i no save insait long ol samting bilong daunim gavman, nogat, mipela i bihainim tok bilong Baibel long beten bilong helpim “ol king na ol man i gat namba,” moa yet taim ol i wokim ol disisen we inap afektim pasin bilong stap fri long mekim lotu.—1 Timoti 2:1, 2.

Mipela i rispektim tu raits bilong ol narapela long wokim ol disisen bilong ol yet long ol samting bilong politik. Olsem: Mipela i no save bagarapim ron bilong ol ileksen o pasim ol man husat i laik vot.

Pasin bilong mipela long i no insait long wok politik i nupela samting long nau? Nogat. Ol aposel na ol narapela Kristen long taim bilong ol aposel i holim wankain tingting long namba ol gavman i holim. Buk Beyond Good Intentions i tok: “Ol Kristen bilong pastaim i save olsem ol i mas rispektim gavman, tasol ol i no tingting long insait long wok politik.” Buk On the Road to Civilization i mekim wankain tok olsem, ol Kristen bilong pastaim “i no holim wanpela wok insait long politik.”

Mipela i no insait long wok politik, so yu ting dispela inap givim hevi long wok bilong gavman long banisim kantri? Nogat. Mipela ol sitisen husat i laikim pasin bilong stap bel isi, olsem na i no gat as long ol lain i holim namba long gavman i tingting planti. Skelim wanpela 2001 ripot em National Academy of Sciences of Ukraine i kamapim. Ripot i tok olsem long pasin bilong mipela long i no insait long wok politik: “Ating sampela i no amamas long samting ol Witnes Bilong Jehova i mekim long sait bilong bilip; em long dispela as na hatpela gavman Natsi na lain Komiunis bilong bipo i sutim tok long ol.” Tasol maski ol i stap aninit long hevi bilong Soviet, ol Witnes “i stap yet olsem ol sitisen i bihainim lo. Ol i onest na daunim laik bilong ol yet na mekim wok long ol fam na ol faktori na ol i no givim hevi long lain Komiunis.” Olsem tu long nau, ol bilip na ol samting ol Witnes Bilong Jehova i mekim i no, “bagarapim wok bilong gavman long banisim na lukautim i stap bilong kantri,” olsem ripot i tok.