Taim yu kamap long bel bilong mama, laip bilong yu i kirap olsem wanpela liklik sel tru ol i kolim saikot, em i liklik tru na ai i no inap lukim. Na bihain long sampela mun, yu kamap wanpela bebi. Dispela wanpela sel i bruk i go planti na senis na i kamapim winim 200 narapela narapela sel we i gat kain kain seip, sais, na wok.

 Tingim: Wanpela saikot i save mekim kopi bilong DNA bilong en na i bruk i go 2-pela. Ol sel i kamap long dispela rot i bruk inap planti taim. Pastaim, olgeta nupela sel i wankain. Insait long DNA bilong ol, i gat ol instraksen ol i nidim bilong wokim olgeta kain sel.

 Wanpela wik bihain long mama i kisim bel, ol sel i save bruk i go long 2-pela grup. Sampela sel bai kamap bebi, na ol narapela sel bai kamapim bilum bilong bebi na ol narapela samting we bai helpim pikinini long gro.

 Long namba 3 wik, ol sel bilong bebi i bruk i go long 3-pela grup. Namba 1 grup bai kamapim ol nev, kru, maus, skin, na ol narapela sel. Namba 2 grup bai kamapim blut, ol bun, kidni, masol, na ol narapela narapela hap long insait long bodi bilong bebi. Na namba 3 grup bai kamapim ol hap insait long bodi olsem, ol lang, rop bilong pispis, na planti hap bilong brukim kaikai.

 Long haptaim mama i gat bel, sampela sel i muv i go long narapela hap—wan wan o insait long ol grup—long sampela hap bilong bebi na i go long ol narapela hap. Ol narapela sel i bung wantaim insait long ol grup na bai ol i kamapim wankain wok. Bilong dispela samting i mas kamap, ol sel i mas wok gut wantaim. Olsem, wanpela grup bilong ol sel inap tanim tanim na kamapim ol liklik tiub. Dispela i save kamap long narapela narapela hap long bodi bilong bebi. Ol dispela tiub i go longpela na i bruk i go nabaut, na nau ol i join na kamapim rot bilong blut long ron.

 Long taim wanpela helti bebi i bon, planti handret bilion sel bilong en i ken mekim wanpela kain wok stret, i stap long ples stret bilong en, na i stap long taim stret.

 Yu ting wanem? Ol narapela narapela wok sel i mekim i kamap long rot bilong evolusen? O wanpela i bin wokim?