“Taim God i stat long wokim ol samting, em i wokim ples antap na graun.”​—Stat 1:1, Nupela Taim Trenslesen.

 “Long stat God i kamapim long nating heven na dispela graun.”​—Jenesis 1:1, King Jems Pisin Baibel.

 Ol tok Baibel i mekim bilong kirapim stori i kamapim klia 2-pela bikpela tok tru. Namba 1, “ples antap na graun,” o yunives, em i gat kirap bilong en. Namba 2, God i bin wokim ol.​—Revelesen 4:11.

 Baibel i no stori long hamas yia i go pinis God i wokim yunives, na tu, em i no stori long olgeta liklik samting long hau God i wokim. Tasol Baibel i tok olsem God i yusim “bikpela strong tru, na narakain pawa tru” long wokim yunives.​—Aisaia 40:26.

 Dispela tok ol i trensletim olsem “wokim,” em i kam long wanpela tok Hibru we i makim eksen bilong man, na ol i save yusim tasol dispela tok taim ol i stori long ol samting God i mekim. a Baibel i kolim Jehova b God tasol olsem Krieta.​—Aisaia 42:5; 45:18.

 Dispela namba 1 ves bilong buk Stat i kirapim stori bilong God i wokim ol samting olsem i stap long Stat sapta 1 na 2. Kirap long Stat 1:1 i go long 2:4, Baibel i stori liklik tasol long ol samting God i mekim bilong wokim graun na olgeta samting i gat laip i stap long en, na tu, namba wan man meri. Bihain long dispela liklik stori tasol bilong karamapim olgeta samting God i wokim, Baibel i stori gut moa long God i wokim man na meri.​—Stat 2:7-25.

 Buk Stat i stori long God i wokim ol samting olsem wanpela wok we i kamap insait long 6-pela “de.” Ol dispela de i no makim ol de stret we i gat 24 aua long en, nogat, ol dispela de i makim sampela haptaim we yumi no save em i longpela olsem wanem. Tru tumas, dispela tok “de” inap makim longpela haptaim na i no de i gat 24 aua long en. Dispela i kamap klia long Stat 2:4, we Baibel i kolim dispela tok “taim” na “de” wantaim long stori long ol samting God i wokim insait long 6-pela de na i stori olsem ol samting i kamap long wanpela “de.”

 Tingting Kranki: Stat 1:1 i soim olsem God em i God Triwan bikos tok Hibru ol i trensletim olsem “God” long dispela ves i makim samting planti man.

 Tok i Tru: Dispela taitol “God” i kam long tok Hibru ’Elo·him, na i makim samting i planti, bilong makim planti glori o biknem, na i no hamas man. Buk New Catholic Encyclopedia i tok olsem ’Elo·himʹ long Stat 1:1 “i save kamap wantaim eksen em wanpela man tasol i mekim, wankain olsem ol king i save tok long ol yet olsem yumi na i no mi, we i makim planti glori samting, olsem na dispela tok i no makim hamas namba bilong ol man.”​—Second Edition, Volume 6, pes 272.