“God i soim pasin laikim bilong em long yumi long dispela rot: Krais i dai bilong helpim yumi taim yumi stap sinman yet.”​—Rom 5:8. Nupela Taim Trenslesen.

 “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.”​—Rom 5:8, Buk Baibel.

 Jehova a God i soim bikpela pasin laikim taim em i larim pikinini bilong em, Jisas Krais, long dai bilong helpim ol sinman. (Jon 3:16) Olsem ol sinman, ol manmeri i save tingting na bihainim ol pasin we i brukim ol stretpela lo bilong God. (Kolosi 1:21, 22) Maski i olsem, God i opim rot na bai yumi inap kamap wanbel wantaim em “long rot bilong dai bilong Pikinini bilong em.” (Rom 5:10) Dispela i kamapim gutpela samting, yumi inap stap pren bilong God long nau na kisim laip oltaim long bihain.​—Rom 5:11; 1 Jon 4:9, 10.

 Aposel Pol i raitim dispela tok i go long ol Kristen i stap long Rom. Long sapta 5 long pas em i raitim i go long ol Rom, Pol i kamapim klia risen na ol Kristen i mas amamas na bilip long ol samting ol i bilip na wet long en. (Rom 5:1, 2) Dispela “samting yumi bilip na wetim i no inap mekim yumi bel hevi” bikos dispela i kamapim bikpela pasin laikim bilong God long rot bilong Jisas. (Rom 5:5, 6) Jisas i kamapim yet pasin bilong bihainim gut tok bilong God, em samting we fes man, Adam, i no mekim. (Rom 5:19) Pasin bilong Adam long sakim tok i bringim sin na dai long olgeta lain pikinini bilong em. (Rom 5:12) Tasol Jisas i bihainim gut tok na givim laip bilong em olsem ofa, na nau rot i op long ol manmeri i bihainim tok long ol inap bilip na wet long kisim laip oltaim.​—Rom 5:21.